Արտասահմանում ԱՄՆ մի շարք դիվանագետների մոտ գլխուղեղի վնասվածքներ են ախտորոշվել. ԱՄՆ-ն կասկածում է ՌԴ-ին և Չինաստանին. The New York Times
Արտասահմանում աշխատող ավելի քան 130 ամերիկացի դիվանագետներ և ռազմական անձնակազմի անդամներ բախվել են ուղեղի վնասվածքի հետ կապված խորհրդավոր խնդիրների, հայտնում է The New York Times-ը ՝ վկայակոչելով նախկին և ներկա պաշտոնյաների խոսքերը:
Նշվում է, որ սկզբում առողջության հետ կապված խնդիրների 60 դեպք է գրանցվել Չինաստանում և Կուբայում: Այժմ վնասվածքի մասին հայտնել են Եվրոպայում և Ասիայում գտնվող դիվանագետները: Աղբյուրների խոսքերի համաձայն, այն առողջական խնդիրները, որոնք գրանցվել են ԱՄՆ-ի տարածքում գտնվելու ժամանակ, ամենայն հավանականությամբ, արտասահմանում տուժած աշխատակիցների հետ կատարվածի հետևանքներն են:
Պարբերականի տվյալներով՝ մարդկանց մոտ ուղեղի վնասվածքների աստիճանը տատանվում է գլխացավերից մինչ ինքնասպանության մտքերի սահմանում:
Շեշտվում է, որ նման դեպքերի մասին տեղեկությունները տարածում են գտել մոտ հինգ տարի առաջ: ԱՄՆ նախկին նախագահ Դոնալդ Թրամփի վարչակազմը փորձել է մեծացնել երկրի պաշտպանության նախարարության ներգրավվածությունն այս դեպքերի պատճառները հետաքննելու գործում: Այնուամենայնիվ, ըստ New York Times-ի, վարչակազմի պաշտոնատար անձինք դժվարությունների են բախվել դաշնային առողջապահական տվյալների պաշտպանվածության պատճառով, որը սահմանափակում է նրանց հասանելիությունն իրենց համար անհրաժեշտ տեղեկատվությանը:
Ըստ թերթի՝ Ազգային անվտանգության խորհուրդը տվյալներ է հավաքագրում՝ նախկինում չգրանցված վնասվածքների հավանական օրինաչափությունները բացահայտելու համար:
ԱՄՆ նախագահ Ջո Բայդենի վարչակազմը կոչ է արել գերատեսչություններին համակարգողներ նշանակել՝ պաշտոնատար անձանց և զինվորականների գլխուղեղի վնասվածքների պատճառները պարզելու և տուժած աշխատակիցներին մատուցվող բժշկական ծառայությունների որակը բարձրացնելու համար:
Հաղորդվում է, որ ԱՄՆ կենտրոնական հետախուզական վարչությունը ստեղծել է հատուկ ստորաբաժանում, որը տեղեկատվություն է հավաքում նոր միջադեպերի վերաբերյալ: Բաժնի փոխտնօրեն Դեյվիդ Քոենին հանձնարարվել է պարզել դեպքի հանգամանքները: Նա ամեն ամիս կհանդիպի տուժած անձնակազմի հետ և կանոնավոր ճեպազրույցներով հանդես կգա Կոնգրեսի անդամների մոտ:
Ավելի վաղ CNN-ը, վկայակոչելով իրազեկ աղբյուրների խոսքերը, հաղորդել էր, որ ԱՄՆ իշխանությունները հետաքննում են երկրում երկու միջադեպ, որոնք կարող են նման լինել արտասահմանում ամերիկացի աշխատողների դեմ «ուղղված էներգիայի» տեխնոլոգիայի օգտագործմամբ հարձակումներին: ԱՄՆ-ում այս հարձակումներից մեկը, ենթադրաբար, տեղի է ունեցել 2020 թվականի նոյեմբերին` Սպիտակ տան մոտ: 2019-ին տեղի է ունեցել մեկ այլ միջադեպ: Այն ժամանակ Սպիտակ տան աշխատակցուհին ասել էր, որ ինքը նման հարձակման է ենթարկվել, երբ շան հետ զբոսնելիս է եղել Վաշինգտոնի սահմանակից Վիրջինիայի այգիներից մեկում:
Աղբյուրների խոսքով՝ դեռևս շարունակում է անհասկանալի մնալ, թե արդյոք ԱՄՆ-ում տեղի ունեցած այս միջադեպերը կապ ունեն արտերկրում նմանատիպ դեպքերի հետ: Հետաքննությանը ներգրավվածները կարծում են, որ հարձակումների հետևում կարող է կանգնած լինել Ռուսաստանը, բայց այս պահին այդ մասին միանշանակ պնդել չի կարելի տեղեկատվության պակասի պատճառով: Կասկածյալների թվում նշվել է նաև Չինաստանը:
Ինչպես հաղորդել է հեռուստաալիքը, այս դեպքերը նմանություններ ունեն 2016 և 2017 թվականներին Կուբայում, ինչպես նաև 2018-ին Չինաստանում ԱՄՆ դիվանագետների շրջանում գրանցված այսպես կոչված «Հավանայի համախտանիշի» դեպքերին: Դիվանագետները, ենթադրաբար, ենթարկվել են ձայնային ազդեցությունների, ինչը հանգեցրել է երկարաժամկետ առողջական հետևանքների:
Հստակեցվում է, որ ԱՄՆ Պետդեպարտամենտը հստակ եզրակացության չի եկել առ այն, թե կոնկրետ ինչն է առաջացրել համախտանիշը: Ժամանակ առ ժամանակ ԱՄՆ մամուլում մեղադրանքներ էին հնչում Ռուսաստանի հասցեին՝ «ակուստիկ գրոհներ» կազմակերպելու համար: ՌԴ ԱԳՆ-ի խոսքով՝ այդ մեղադրանքները «կատարյալ անհեթեթություն և տարօրինակ ակնարկներ են»: