Էդվարդ Նալբանդյան. Բոլոր աշխատանքային փաստաթղթերում քննարկվում էր Լեռնային Ղարաբաղի միջանկյալ կարգավիճակը

Նոյեմբերի 9-ի հայտարարության մեջ չկա գլխավոր հարցը` Լեռնային Ղարաբաղի վերջնական կարգավիճակը: Ռուսաստանի ղեկավարության հետագա հայտարարություններում նշվել է, որ հարցը բաց է մնում եւ կարող է քննարկվել հետագայում: Այս մասին դեկտեմբերի 11-ին ղարաբաղյան հակամարտության վերաբերյալ քննարկման ժամանակ ասաց Հայաստանի նախկին արտգործնախարար Էդվարդ Նալբանդյանը (այս պաշտոնը զբաղեցրել է 2008-2018 թվականներին):

Ըստ նրա` դա շատ կարեւոր կետ է, եւ այն քննարկվել է բանակցությունների տարբեր փուլերում, այդ թվում` Կազանում:

«Շատ կարեւոր է, թե որքանով ԵԱՀԿ Մինսկի խմբի համանախագահները կկարողանան շարունակել բանակցությունները ժամանակավոր կարգավիճակի որոշման շուրջ: Ի՞նչ է լինելու Ղարաբաղի հետ, ինչպե՞ս է այն ղեկավարվելու: Կողմերի քննարկած բոլոր աշխատանքային փաստաթղթերի համաձայն` սա շատ լուրջ կետ է, որտեղ սահմանվում էր, որ ժամանակավոր կարգավիճակի ընթացքում Լեռնային Ղարաբաղը կձեւավորի իշխանության բոլոր ճյուղերը, իրավապահ համակարգը եւ կունենա արտաքին հարաբերությունների հնարավորություն: Բացի այդ, այս ժամանակահատվածում Լեռնային Ղարաբաղը կարող է իրավունք ունենալ մասնակցել միջազգային կազմակերպություններին, եթե միջանկյալ կարգավիճակը չի խանգարում դրան, հնարավորություն կունենա ուղիղ օտարերկրյա ներդրումներ ստանալ, մուտք ունենալ դեպի արտաքին շուկաներ, ուղիղ տնտեսական եւ հումանիտար օգնություն ստանալ: Ամենակարեւորն այն է, թե ի՞նչ է լինելու անվտանգության հետ ժամանակավոր կարգավիճակի ընթացքում»,- նշել է նա: