Արմեն Թավադյանի շարժական և անշարժ գույքի վրա դրված կալանքը կվերացվի

Երևանի ընդհանուր իրավասության դատարանը՝ դատավոր Կարեն Ֆարխոյանի նախագահությամբ, մասնակի բավարարեց «5-րդ ալիք» ՀԸ սեփականատեր Արմեն Թավադյանի շարժական և անշարժ գույքի վրա դրված կալանքը վերացնելու մասին փաստաբանի միջնորդությունը։

Մասնավորապես՝ շարժական և անշարժ գույքի վրա դրված կալանքը վերացվեց, իսկ դրամական միջոցների վրա դրված կալանքը կպահպանվի՝ 1 մլն 512 հազար ՀՀ դրամի չափով։

Ավելի վաղ հայտնել ենք, որ Արմեն Թավադյանի պաշտպանը միջնորդություն էր ներկայացրել՝ Թավադյանի գույքի վրա դրված արգելանքը վերացնելու մասին։ Մեղադրող և տուժող կողմն այսօրվա դատական նիստին ներկայացրեց իր առարկությունները։

Հիշեցնենք, որ Արմեն Թավադյանը մեղադրվում է «Մարտի 1»-ի գործով տուժողներից մեկին ենթադրաբար կաշառելու, 2019 թվականի մայիսի 13-ին Երևանի ընդհանուր իրավասության դատարանի Ավան նստավայրի շենքի առաջին հարկում տեղի ունեցած միջադեպի ժամանակ ջրի պլաստիկե շշով Վարդգես Գասպարին հարվածելու համար։