ԱՄՆ գլխավոր վարակաբանը դեմ հանդես կգա սահմանափակումների վաղաժամ վերացմանը

Միացյալ Նահանգների Ալերգիկ եւ վարակիչ հիվանդությունների ազգային ինստիտուտի տնօրեն Էնթոնի Ֆաուչին մտադիր է նախազգուշացնել Կոնգրեսին երկրում COVID-19-ի բազմաթիվ բռնկումների սպառնալիքների մասին` համաճարակաբանական սահմանափակումների վաղաժամ վերացման դեպքում: Այս մասին հաղորդել է The New York Times-ը` վկայակոչելով Միացյալ Նահանգների գլխավոր վարակաբանից ստացված հաղորդագրությունը, հայտնում է ՏԱՍՍ-ը:

Երեքշաբթի Սենատի առողջության, կրթության, աշխատանքի եւ կենսաթոշակների հարցերով հանձնաժողովը կորոնավիրուսի տարածումը կանխմանն ուղղված միջոցառումներին նվիրված լսումներ կանցկացնի: Ֆաուչին հեռավար կարգով կպատասխանի սենատորների հարցերին, եւ, ինչպես սպասվում է, չի խոսի ԱՄՆ նախագահ Դոնալդ Թրամփի ներկայությամբ: ԱՄՆ առաջատար ԶԼՄ-ները հույս ունեն, որ վարակաբանն ավելի կոշտ տոնով կարտահատվի սահմանափակումների չեղարկման դեմ, քան Սպիտակ տանը ճեպազրույցների ժամանակ էր:

«Գլխավոր ուղերձը, որը ես ցանկանում եմ ներկայացնել Սենատի առողջապահության, կրթության, աշխատանքի եւ կենսաթոշակների հարցերով հանձնաժողովին, երկիրը վաղաժամ բացելու փորձերի վտանգի մասին է,- գրել է Ֆաուչին:- Եթե մենք բաց թողնենք «Բացել Ամերիկան»-ի միջանկյալ դրույթները, ապա կհայտնվենք ամբողջ երկրում բազմաթիվ բռնկումների սպառնալիքի առջեւ: Դա ոչ միայն ավելորդ տառապանքների եւ մահվան կհանգեցնի, այլեւ մեզ հետ կգցի դեպի նորմալացում տանող ճանապարհին»,- հավելել է վարակաբանը:

Հոփկինսի համալսարանի տվյալներով, որոնք հաշվարկներ են կատարում դաշնային եւ տեղական իշխանությունների տվյալների հիման վրա` Միացյալ Նահանգներում գրանցվել է նոր կորոնավիրուսով վարակման ավելի քան 1.34 միլիոն դեպք, մահացել է 80 682 մարդ: