ՄԻԵԴ-ը նորից վճիռ է կայացրել հօգուտ Խաջիդա Իսմայլովայի

Մարդու իրավունքների եվրոպական դատարանը վճռել է, որ Ադրբեջանը չի կատարել անձնական կյանքին միջամտելուց հետաքննող լրագրող Խաջիդա Իսմայլովային պաշտպանելու պարտավորությունը:

Ըստ ՄԻԵԴ-ի, պետությունը պետք է տուգաներ ադրբեջանական պարբերականին Իսմայլովայի անձնական, այդ թվում` սեռական կյանքի մասին անպարկեշտ և տգեղ մեկնաբանություններ հրապարակելու անազնիվ գործելակերպի համար:

ՄԻԵԴ-ը վճռել է, որ Ադրբեջանի պետությունը հետաքննող լրագրողին որպես հատուցում պետք է վճարի 6 հազար եվրո (դա հավասար է 6 հազար 500 ԱՄՆ դոլարի):

ՄԻԵԴ-ն արդեն երրորդ անգամ է որոշում կայացնում Իսմայլովայի հարցով:

Իսմայլովան լրագրողական հետաքննություն է իրականացրել Ադրբեջանում բարձրաստիճան պաշտոնյաների շրջանում կոռուպցիոն գործարքների մասին, որոնց հետ առնչություն ունի նաև նախագահ Իլհամ Ալիևի գերդաստանը:

2015 թվականին Ադրբեջանի դատարանը հարկերից խուսափելու կեղծ մեղադրանքով Իսմայլովային դատապարտել է 7 և կես տարվա ազատազրկման:

2016-ին լրագրողին պայմանական ազատ են արձակել, սակայն նա դեռ զրկված է երկրից հեռանալու իրավունքից:

Amnesty International իրավապաշտպան կազմակերպության Հարավային Կովկասի հետազոտությունների բաժնի աշխատակից Նատալիա Նորաձեն «Ազատությանն» ասել է, որ «Իսմայլովայի գործը վկայում է անվանի լրագրողներին ահաբեկելու, լռեցնելու և երկրում խոսքի ազատությունը սահմանափակելու Ադրբեջանի արդարադատության համակարգի գործելակերպի մասին»: