Լուկաշենկոն՝ նախագահական ընտրությունների մասին. դա հաստատապես ամռանը կլինի, ծայրահեղ դեպքում՝ օգոստոսի վերջին

Բելառուսում մոտ ժամանակում կորոշվի առաջիկա նախագահական ընտրությունների անցկացման օրը: Այս մասին այսօր հայտարարել է Բելառուսի նախագահ Ալեքսանդր Լուկաշենկոն՝ իր մոլդովացի գործընկեր Իգոր Դոդոնի հետ տեսակոնֆերանսի ձեւաչափով բանակցությունների ժամանակ, փոխանցում է ԲԵԼՏԱ-ն:

«Գիտեք, որ դուք Բելառուսում միշտ ցանկալի հյուր եք: Ցանկացած ժամանակ, հենց ձեզ թույլ տան հանգամանքները: Գիտեմ, որ ձեզ մոտ նախագահական ընտրություններ են, բայց մեզ մոտ նախագահական ընտրություններն ավելի վաղ կկայանան: Մենք հիմքեր չունենք այն տեղափոխելու, Սահմանադրությամբ այս ընտրությունների տեղափոխման հնարավորություն չկա: Այս պատճառով մենք ընտրությունները կանցկացնենք, մոտ ժամանակում օրը կորոշենք: Դա հաստատապես ամռանը կլինի: Ծայրահեղ ժամկետը օգոստոսի վերջն է»,- հայտարարել է պետության ղեկավարը:

Ինչ վերաբերում է Մոլդովայում առաջիկա նախագահական ընտրություններին, Ալեքսանդր Լուկաշենկոն նշել է, որ Իգոր Դոդոնը ստանում է մոլդովացի ժողովրդի ավելի մեծ աջակցությունը: «Ինձ թվում է, որ մոլդովացի ժողովուրդը պատրաստ է աջակցել այն առաջարկներին, որոնք դուք այսօր ձեր թիմի հետ ներկայացրել եք մոլոդովացիների քննարկմանը»,- վստահ է Բելառուսի առաջնորդը:

Նա հավաստիացրել է, որ Բելառուսը պատրաստ է, ինչպես նախկինում, ակտիվորեն զարգացնել Մոլդովայի հետ համագործակցությունը. «Գիտեք, որ մենք միշտ ձեր կողքին ենք, միշտ պատրաստ ենք աջակցել ձեր ժողովրդին: Մենք Մոլդովայի համար կարող ենք շատ բան անել: Հենց ձեզ մոտ սահմանափակումները հանվեն, պատրաստ ենք ձեզ մոտ գալ, թռչել, առեւուր անել, շփվել: Ուրախ կլինենք մեզ մոտ Բելառուսում տեսնել նաեւ Մոլդովայի ներկայացուցիչներին»: