Թրամփը հայտարարել է, որ ԱՄՆ ներգաղթը դադարեցնելու մասին հրամանագիր կստորագրի՝ ամերիկացիների աշխատատեղերը պահպանելու համար

 ԱՄՆ նախագահ Դոնալդ Թրամփը հայտարարել է, որ երկիր ներգաղթը դադարեցնելու մասին հրամանագիր կստորագրի՝ ԱՄՆ քաղաքացիների աշխատատեղերը պահպանելու համար։ Այդ մասին Սպիտակ տան ղեկավարը տեղեկացրել է Twitter-ում։

«Հաշվի առնելով անտեսանելի թշնամու հարձակումը, ինչպես նաև մեր ԱՄՆ քաղաքացիների աշխատատեղերը պաշտպանելու անհրաժեշտությունը՝ ես ԱՄՆ-ում ներգաղթի դադարեցման մասին կհրամանագիր կստորագրեմ»,- գրել Է Թրամփը։

BBC-ն գրում է, որ կառավարությունն օգտագործում է այս համավարակը ներգաղթը ճնշելու նպատակով։

«Գաղտնիք չէ, որ նախագահը և մի քանի առանցքային խորհրդականներ ներգաղթը դիտարկում են կապիտալի արտահոսք։ Եվ Թրամփի գրառումն առ այն, որ այս քայլն անհրաժեշտ է ոչ թե ազգի առողջությունը, այլ «իր քաղաքացիների աշխատատեղերը» պաշտպանելու համար, դրա վառ ապացույցն է»,- գրում է աղբյուրը։

Թրամփը նախագահի պաշտոնում ընտրվելուց հետո ձեռնամուխ է եղել Մեքսիկայի հետ սահմանին պատի կառուցմանը, ինչպես նաև սահմանափակել է առավելապես մահմեդական 7 երկրներից քաղաքացիների և փախստականների մուտքը ԱՄՆ՝ դա բացատրելով ահաբեկչության սպառնալիքով։

Թրամփը նաև բազմիցս դժգոհել է ներգաղթի առկա համակարգից, որի համաձայն՝ երկիր են մուտք գործում առավելապես ԱՄՆ-ում արդեն բնակվող ներգաղթյալների հարազատները: Նախագահն առաջարկել է գործարկել նոր համակարգ, որը կդիտարկի հասարակության համար նոր ներգաղթյալի օգտակարությունը, ներառյալ՝ կրթության մակարդակն ու աշխատունակությունը։ Թրամփի նախաձեռնությունները հավանության չեն արժանացել Կոնգրեսում։

Վերջին չորս շաբաթվա ընթացքում ավելի քան 20 մլն ամերիկացի կորոնավիրուսի ֆոնին գործազուրկ է դարձել։