Հիսուս Ամենափրկիչ արձանը լուսավորվել է ի պատիվ կորոնավիրուսի դեմ պայքարող բուժաշխատողների․ ABC (լուսանկարներ)

Բրազիլիայի Ռիո դե Ժանեյրո քաղաքում՝ Կորկովադու լեռան գագաթին վեր խոյացող Հիսուս Ամենափրկիչ արձանը երեկ լուսավորվել է ի պատիվ կորոնավիրուսի դեմ պայքարի առաջնագծում մարտնչող բուժաշխատողների, հաղորդում է ABC News-ը։

Ավելի վաղ՝ մարտի 18-ին, ի նշան համերաշխության, Հիսուս Ամենափրկիչը լուսավորվել էր մայրցամաքների և համավարակի դեմ պայքարող երկրների դրոշների պատկերներով:

Միջազգային լրատվամիջոցների տվյալներով՝ վիրուսի տարածումը զսպելու նպատակով բրազիլական Չիկո Մենդեսի ինստիտուտը կարգադրել է փակել բոլոր ազգային այգիներն ու հուշարձանները, այդ թվում՝ 38մ բարձրությամբ աշխարհահռչակ արձանը։

Վերջին տվյալներով՝ Բրազիլիայում հաստատվել է կորոնավիրուսի 22 318 դեպք, որից 1230-ը՝ մահվան ելքով։

Առողջապահության համաշխարհային կազմակերպությունը մարտի 11-ին նոր կորոնավիրուսը համավարակ էր հայտարարել: Վերջին տվյալներով՝ աշխարհում գրանցվել է վարակման 1 853 183 դեպք, 114 248-ը՝ մահվան ելքով, ապաքինվել է 423 625 մարդ։ Համաճարակի օջախ Չինաստանի սահմաններից դուրս վարակը տարածվել է 210 երկրում: