Ապրիլի 12-ին նշվում է Տիեզերք մարդու թռիչքի միջազգային օրը

Ապրիլի 12-ին ամբողջ աշխարհը նշում է Տիեզերագնացության ու ավիացիայի օրը, որը հիշարժան օր է՝ նվիրված տիեզերք մարդու առաջին թռիչքին: Դա հատուկ օր է, որը խորհրդանշում է գիտության եւ տիեզերագնացության ոլորտում այսօր աշխատող բոլոր մարդկանց հաղթանակը, հայտնում է Calend.ru-ն:

Տիեզերագնացության օրը՝ որպես տոն, հիմնադրվել է Խորհրդային Միությունում, ԽՍՀՄ Գերագույն խորհրդի նախագահության 1962 թվականի ապրիլի 9-ի հրամանով, իսկ միջազգային կարգավիճակ է ստացել 1968 թվականին միջազգային ավիացիոն ֆեդերացիայի համաժողովում:

Ի դեպ, 2011 թվականից այն եւս մեկ անուն է կրում՝ Տիեզերք մարդու թռիչքի միջազգային օր (International Day of Human Space Flight): Այս մասին 2011 թվականի ապրիլի 7-ին ՄԱԿ ԳՎ հատուկ լիագումար նիստում Ռուսաստանի նախաձեռնությամբ պաշտոնապես ընդունվել է № A/RES/65/271 բանաձեւը՝ տիեզերական տարածության յուրացման գործում առաջին քայլի 50-ամյակի կապակցությամբ: Բանաձեւի համահեղինակներն են դարձել ավելի քան 60 պետություններ: