Պուտինը՝ կորոնավիրուսի մասին. Ամեն ինչ անցնում է, սա էլ կանցնի: Կհաղթենք նաեւ այս կորոնավիրուսային վարակը

«Ամեն ինչ անցնում է, սա էլ կանցնի: Մեր երկիրը շատ անգամ է անցել լրջագույն փորձությունների միջով, ե՛ւ պեչենեգներն են ծվատել, ե՛ւ ղփչաղները. Ռուսաստանը բոլորին հաղթահարել է: Կհաղթենք նաեւ այս կորոնավիրուսային վարակը: Մենք միասին ամեն ինչ կհաղթահարենք,- այս մասին հայտարարել է ՌԴ նախագահ Վլադիմիր Պուտինը:

Նրա խոսքով՝ մեծամասնությունը մշտապես 4 պատերի մեջ է, ինչը տաղտկալի ու զզվելի է: «Բայց հիմա ընտրության հնարավորություն չկա: Պետք անպայման դիմանալ ինքնամեկուսացման ռեժիմին, դրա փորձությանը: Մեր կարգապահությունից եւ պատասխանատվությունից է կախված ինֆեկցիայի դեմ պայքարում այն բեկումը, որին մենք պետք է անպայման հասնենք: Մենք ուշադիր ուսումնասիրում ենք բոլոր երկրների փորձը, որոնք նույնպես բախվել են կորոնավիրուսային սպառնալիքին, իսկ այն ասում է, որ ամենաբարդը, ամենադժվարը համաճարակը սկսվելուց հետո առաջին 4-5 շաբաթներն են: Սա նշանակում է, որ մեր իրավիճակի զարգացման համար որոշիչ կլինեն առաջիկա 2-3 շաբաթները: Սա այն ժամանակահատվածն է, երբ մեզնից պահանջվում է բոլոր ռեսուրսների առավելագույն կենտրոնացում, բժիշկների հանձնարարականների ամենախիստ կատարում, այն կանխարգելիչ միջոցառումների, որոնք այսօր մտցվում են յուրաքանչյուր տարածաշրջանում»,- ասել է Պուտինը:

Պուտինը նաեւ հայտնել է, որ կորոնավիրուսային ինֆեկցիայով պացիենտների հետ աշխատող բժիշկները 80 հազար ռուբլի լրավճար են ստանալու: Միջին բուժանձնակազմի համար լրավճարի չափը կազմելու է 50 հազար ռուբլի, կրտսեր կազմի համար՝ 25 հազար ռուբլի: Վճարումնները կատարվելու են 3 ամսվա ընթացքում՝ ապրիլից սկսած:

Լրավճարներ կստանան նաեւ կորոնավիրուսով պացիենտների հետ աշխատող շտապ օգնության աշխատակիցները, բժիշկները՝ ամսական 50-ական հազար ռուբլի, բուժակները, բուժքույրերը եւ վարորդները՝ 25-ական հազար ռուբլի: