Նիկոլ Փաշինյանն ուզում է հետեւել մեզնից յուրաքանչյուրին

Նիկոլ Փաշինյանը կորցնելով իր ընտրազանգվածի ճնշող մեծամասնությանը, նոր դաշնակից է ձեռք բերել՝ կորոնավիրուսին: Օգտվելով երկրում հայտարարված արտակարգ իրավիճակից, օգտվելով համավարակի մասին անդադար տրվող տեղեկատվությունից առաջացած խուճապային տրամադրություններից նա փորձում է իրականացնել աշխարհում չտեսնված հակաժողովրդավարական մի գործողություն՝ պարտավորեցնել «Բիլայնին», «Յուքոմին», «ՎիվաՍելին»՝ պետությանը, այլ կերպ ասած, հենց իրեն տրամադրել մեզնից յուրաքանչյուրի վերաբերող անձնական տվյալներ:

Նախկին իշխանություններին հակաժողովրդավարական քայլերի համար տեղի ու անտեղի քննադատող, ժողովրդավարության եւ մարդու իրավունքների համար անդադար պայքար մղած Նիկոլ Փաշինյանն այսօր ուզում է իմանալ ՀՀ հպարտ եւ ոչ այնքան հպարտ քաղաքացիների գտնվելու վայրը, տեղաշարժը եւ հաղորդակիցների շրջանակը:

Միայն այս նախաձեռնությունը բավական է, որ Փաշինյանը թողնի իր զբաղեցրած պաշտոնը եւ ընդհանրապես հեռանա քաղաքականությունից: Եւ բոլոր նրանք, ովքեր այսօր պաշտպանում են այս նախաձեռնությունը, անկախ նրանից, թե ինչ դրդապատճառներ կամ պատճառաբանություններ կբերեն, մի օր եւ շատ շուտով մեկ առ մեկ բացատրություն են տալու ՀՀ քաղաքացիներին: 

Նիկոլ Փաշինյանը եւ նրա կողմից ղեկավարվող իմքայլականները ցանկանում են, որ մեզնից յուրաքանչյուրը իր մոտ ունենա ինչ-որ սարքեր կամ ինչ-որ ծրագիր, միայն նրա համար, որ մեզ հեշտ վերահսկեն: Ավելին, ՀՀ դուխով եւ հպարտ քաղաքացիներին շատ սիրող Փաշինյանը ցանկանում է իր կամքը չկատարողներին տուգանել 100-200 հազար դրամով: 

Ի դեպ, ոմանք կասեն, թե այս ամենը վերաբերում է միայն արտակարգ դրության ժամանակահատվածին: Նախ, սա անընդունելի է պահանջ է նույնիսկ արտակարգ դրության ժամանակ, եւ բացի այդ, ի՞նչ երաշխիք, որ մեր գտնվելու վայրը չի վերահսկվելու նաեւ արտակարգ դրույթան ռեժիմի վերացումից հետո: Ի վերջո մենք ոչ Գերմանիայում ենք, ոչ էլ Շվեդիայում:

Ինչ վերաբերում է կորոնավիրուսին, ապա Փաշինյանը սխալվում է, կարծելով, թե այն իր դաշնակիցն է: Ոչ, կորոնավիրուսը եկավ միայն, որ ավելի լայն բացվի Հհ քաղաքացիների աչքերը, որոնք եթե ոչ այսօր, ապա վաղը տեսնելու եւ հասկանալու են վարչապետի քայլերի տրամաբանությունն ու նպատակը եւ նրան բազմաթիվ հարցեր են տալու, որոնց անպայման պետք է պատասխաններ տրվեն:

Վարդան Մխիթարյան

Top-News.am