Խելահեղ «բոքսինգ դեյ»-ի առաջին տուրի անակնկալները

Ֆուտբոլի Անգլիայի առաջնությունն ամենադիտարժանն է աշխարհում: Այս համոզմանն են ավելի ու ավելի մեծ թվով ֆուտբոլասերներ: Պատահական չէ, որ Չեմպիոնների լիգայի եւ Միջմայրցամաքային գավաթի հաղթողը անգլիական Լիվերպուլն է: Եւ վերջապես խելահեղ «Բոքսինգ դեյ» Անգլիայից բացի որեւէ մեկը չունի:

Երեկ ուշ երեկոյան ավարտվեց ֆուտբոլային արագավազքի առաջին տուրը: Հայ ֆուտբոլասերին լավ ծանոթ Վուլվերհեմփթոնը, որն ամռանը հաղթեց Փյունիկին, երեկ 2:0 հաշվով պարտվում էր Մանչեսթեր Սիթիին, բայց իր մեջ ուժ գտավ եւ հաղթեց 3:2 հաշվով: Ընդ որում, արդեն 12-րդ րոպեին մանչեսթերցիները մնացել էին տասը հոգով, բայց դրանից հետո հաջողացրել էին երկու գոլ խփել:

Այս խաղիղ մեկ օր առաջ Լիվերպուլը, որը գլխավորում է մրցաշարային աղյուսակը եւ Միջմայրցամաքային գավաթը նվաճելուց հետո անցկացնում էր առաջին խաղը, մրցակցի դաշտում 4:0 հաշվով հաղթեց երկրորդ տեղում ընթացող Լեսթերին:

Այսպիսով, «Բոքսինգ դեյ»-ի առաջին տուրում առաջատար եռյակից հաղթեց միայն Լիվերպուլը: Ավելին, պարտվեց նաեւ չորրորդ տեղում գտնվող Չելսին՝ սեփական դաշտում 2:0 հաշվով զիջելով ուժեղագույնների խմբում մնալու համար կատաղի պայքար մղող Սաութհեմփթոնին:

Չելսիի անհաջողությունից օգտվեց Մոուրինիոյի Տոտենհեմը՝ 2:1 հաշվով կամային հաղթանակ տանելով Բրայթոն&Հով Ալբիոնի նկատմամբ: Այժմ Տոտենհեմը չորրորդ տեղում գտնվող Չելսիից հետ է մնում ընդամենը երեք միավորով: Սա դեռ չի նշանակում, որ հինգերորդը Տոտենհեմն է: Ոչ, հինգերորդը Վուլվերհմփթոնն է, որն ունի 30 միավոր՝ մեկով ավելի, քան Մոուրինիոյի թիմը:

Այսպիսով, «Բոքսինգ դեյ»-ի առաջին տուրից հետո Լիվերպուլը Լեսթերից եւ Մանչթեսթեր Սիթիից առաջ է անցել համապատասխանաբար 13 եւ 14 միավորով:

Ուժեղագույնների խմբում մնալու համար պայքար մղող թիմերից հաղթանակ տարավ Աստոն Վիլան՝ 1:0 հաշվով հաղթելով արդեն վերջին տեղում գտնվող Նորվիչին: Նախավերջին տեղում գտնվող Վոթֆորդը 1:1 խաղաց Շեֆիլդ Յունայթեդի հետ, իսկ Վեսթ Հեմը 2:1 հաշվով պարտվեց Քրիսթալ Փելեսից եւ ընդամենը մեկ միավոր ավելի ունի 18-րդ տեղում գտնվող Աստոն Վիլայից:

Արդեն այսօր կսկսվի «Բոքսինգ դեյ»-ի երկրորդ տուրը: Կկայանա յոթ խաղ: Ամենահետաքրքիրը, կարծում ենք, կլինեն Վոթֆորդ-Աստոն Վիլա եւ Վեսթ Հեմ-Լեսթեր հանդիպումները:

Top-News.am