Օվկիանարիումի դելֆինները նկարել են սովորել

Պրիմորիեի օվկիանարիումում ապրում է 6 խաղաղօվկիանոսային աֆալին: Ստեղծագործող դելֆիններ Վասյան եւ Բոնյան ոչ միայն երգում են եւ վալս պարում, այլեւ հիմա կարող են նաեւ նկարել, հայտնում է «ՌԻԱ Նովոստի»-ն՝ վկայակոչելով Պրիմորիեի օվկիանարիումի մամուլի ծառայությանը:

Դելֆիններն իսկական նկարիչների նման մոլբերտի վրա վրձիններով նկարներ են ստեղծում, մարզիչը նախապես վրձինը ներկի մեջ է թաթախում:

Ստեղծագործելիս օգտագործվում է միայն ոչ թունավոր անվտանգ գուաշ՝ նախատեսված երեխաների համար մատներով նկարելուն: Բոնյան եւ Վասյան կապույտ, կարմիր եւ դեղին ներկերով ջանադրորեն գծեր են քաշում, կետեր դնում: Նրանց աբստրակտ նկարներում կարելի է ալիքներ, ծովային կաղամբ, ճայեր, արեգակ եւ նույնիսկ դելֆինների ուրվագծեր տեսնել, գլխավորը երեւակայությունն է:

Դելֆինների մարզիչ Աուրիկա Կնաուսի խոսքով՝ ամենադժվարը վարժելն է: Դելֆիններին նախ պետք է սովորեցնել վրձինը բռնել, որ այն վայր չգցեն: Այնուհետեւ պետք է ցույց տալ ձեռքի սահուն շարժումները, որից հետո դելֆինները սկսում են հետքով գլուխները շարժել: Ամենադժվարը մոլբերտի վրա ինքնուրույն նկարելն է:

Գեղանկարչությունն ամենից ավելի Վասյային է ոգեւորել: Բոնյան դեռեւս վրձինն անվստահ է բռնում եւ հանդիսատեսի առաջ ամաչում է նկարել:

Հարկ է նշել, որ նկարը կարելի է նվեր ստանալ: Մարզիչը ներկայացման ժամանակ նկարը նվիրում է պատահական հանդիսատեսի:

NEWS.am