Որոնք են 2017թ. ամենազարգացած զբոսաշրջային ոլորտն ունեցող երկրները

Համաշխարհային տնտեսական ֆորումի (WEF) մասնագետները կազմել են Զբոսաշրջության զարգացման ամենամյա ինդեքսը, որում առանձնացրել են ամենազարգացած զբոսաշրջային ոլորտն ունեցող երկրներին: Travel and Tourism Competitiveness Report վերնագրով հետազոտությունը հրապարակվել է կազմակերպության կայքում:

Վարկանիշը կազմելու ընթացքում հաշվի են առնվել այնպիսի ցուցանիշներ, ինչպիսիք են հանրապետության բաց լինելը, ենթակառուցվածքների և ավիահաղորդակցության զարգացման մակարդակը, բնական և մշակութային տեսարժան վայրերը, անվտանգությունը և այլն:

Հետազոտության արդյունքների համաձայն՝ 2017 թվականին ամենազարգացած զբոսաշրջային ոլորտն ունեցող երկիր է ճանաչվել Իսպանիան:

Վարկանիշի երկրորդ տեղը զբաղեցրել է Ֆրանսիան, իսկ երրորդ տեղում հայտնվել է Գերմանիան:

Կազմակերպության թոփ տասնյակում ներառվել են նաև Ճապոնիան, Մեծ Բրիտանիան, ԱՄՆ-ն, Ավստրալիան, Իտալիան, Կանադան և Շվեյցարիան:

136 երկիր ներառող ցանկում Հայաստանը զբաղեցրել է 84-րդ, Ադրբեջանը՝ 71-րդ, Վրաստանը՝ 70-րդ, Իրանը՝ 93-րդ, Ռուսաստանը՝ 43-րդ, Թուրքիան՝ 44-րդ տեղը։