Գերմանիայում ահաբեկչություն նախապատրաստելու գործով բունդեսվերի եւս մեկ սպա է ձերբակալվել

Գերմանիայի իրավապահ մարմինները ձերբակալել են բունդեսվերի 27-ամյա ավագ լեյտենանտ Մաքսիմիլիան Տ.-ին, ում կակածում են ահաբեկչություն նախապատրաստելուն մասնակցելու մեջ։ Այս մասին հաղորդում է Spiegel Online պարբերականը։

Գործով գլխավոր գործող անձ է ձերբակալվածի ծառայակից Ֆրանկո Ա.-ն, ով ենթադրաբար ահաբեկչական հարձակումներ էր նախապատրաստում։ Մաքսիմիլիան Տ.-ն եւ Ֆրանկո Ա.-ն ծառայում են լեռնային հրաձիգների միակ համատեղ գերմանա-ֆրանսիական բրիգադում։

Ավագ լեյտենանտ Ֆրանկո Ա.-ի գործով նախնական հետաքննությունը սկսվել է հունվարի վերջին, երբ Վիեննայի օդանավակայանի զուգարանում 7,65 մմ տրամաչափի ատրճանակ է հայտնաբերվել։ Փետրվարի 3-ին նա վերադարձել է ատրճանակը վերցնելու համար, սակայն ձերբակալվել է ավստրիական իշխանությունների կողմից, ինչից հետո նրա դեմ քրեական գործ է հարուցվել։

2015 թվականի դեկտեմբերի վերջին Ա.-ն իշխանություններին կեղծ փաստաթղթեր է ներկայացրել ու իրեն ներկայացրել որպես սիրիացի փախստական՝ տեղավորվելով փախստականների համար նախատեսված ապաստանում։ Ըստ դատախազության՝ Ֆրանկո Ա.-ն երկակի կյանք է վարել։

Ավելի ուշ այդ գործով ձերբակալվել է նրա ենթադրյալ հանցակիցը՝ 24-ամյա ուսանողը, Օֆենբախից։

Ինչպես նշում է Spiegel Online-ը՝ Մաքսիմիլիան Տ.-ի ձերբակալությունից հետո քննությունն ավելի շատ ապացույցներ ունեցավ այն տարբերակի, որ բունդեսվերի կազմում գործել է «աջակողմյան գաղափարներ դավանող համախոհների շրջանակ կամ նույնիսկ աջ ծայրահեղականների ահաբեկչական միջուկ»։

NEWS.am