Բիլ Քլինթոնը թրիլեր է գրելու ամերիկյան նախագահի մասին

ԱՄՆ նախկին նախագահ Բիլ Քլինթոնը հայտնի գրող Ջեյմս Փաթերսոնի հետ միասին գրելու է իր առաջին վեպը, որի գլխավոր հերոսն է դառնալու ԱՄՆ նախագահը, հայտնում է Hollywood Reporter–ը։

Alfred A. Knopf եւ Hachette հրատարակչատների համատեղ հայտարարության մեջ ասվում է, որ այդ վեպն իրենից ներկայացնում է «ինտրիգների, տագնապալի ակնկալինքների ու համաշխարհային մասշտաբի անդրկուլիսյան դրամայի ունիկալ համադրություն»։ Նշում են, որ վեպի սյուժեն ամբողջովին հեղինակների մտքի ստեղծածն է ու իրականության հետ ոչ մի կապ չունի։

«Սա պատմություն է ԱՄՆ նախագահի մասին, ես կներկայացնեմ այն ամենը, ինչ գիտեմ այդ աշխատանքի, Սպիտակ տան մասին, այն մասին, թե ինչպես է աշխատում Վաշինգտոնը, այս աշխատանքը մեծ բավականություն է պատճառում ինձ»,- ասվում է Քլինթոնի հայտարարության մեջ։

Փաթերսոնը, որը հայտնի է դետեկտիվ ու թրիլեր ժանրերում իր աշխատանքներով, այսպես է մեկնաբանել աշխատանքը․ «Ես պատմողն եմ, իսկ թեմային Քլինթոնի լավատեղյակության շնորհիվ մենք կկարողանանք իսկապես տպավորիչ պատմություն պատմել»։

Վեպը կոչվելու է «Նախագահն անհետացել է»։ Դրա հրատարակումը ծրագրված է 2018-ի հունիսին։

NEWS.am