Եթե Չինաստանը փակի նավթի փականը, Հյուսիսային Կորեայում ամեն ինչ կանգ կառնի

Բռնապետ Կիմ Չեն Ընի կողմից կառավարվող երկիրը կախման մեջ է գտնվում Չինաստանի հետ առեւտրից, որի շրջանառությունը վերջերս ավելի էր աճել, հայտնում է Die Welt–ը։ Հիմա Փհենյանում սպառվում է բենզինը, հարց է առաջանում՝ արդյո՞ք Պեկինը կդադարեցնի մատակարարումները։

Ավտոլցակայանները այսօրվա դրությամբ այլեւս բենզին չեն ստանում, գրում է պեկինյան Global Times թերթը։ Ամերիկյան AP տեղեկատվական գործակալությունը արձանագրում է, որ վառելիքի գները աճել են 70 տոկոսով՝ 70-80 ցենտից մինչեւ 1․25 դոլար մեկ լիտրի համար։

«Կիմ Չեն Ընի ռեժիմը,- գրում է հեղինակը,- պատրաստվում է նոր պատժամիջոցների։ ԱՄՆ-ի, Ճապոնիայի ու Հարավային Կորեայի բանակցողները, որոնք ներկայացնում են իրենց երկրները Հյուսիսային Կորեայի հետ դեռ 2009-ից սառեցված բազմակողմանի բանակցություններում, Փհենյանից պահանջել են հրաժարվել միջուկային ու հրթիռային ծրագրերից։ ԱՄՆ նախագահ Դոնալդ Թրամփը ՄԱԿ ԱԽ-ից պահանջում է ավելի խիստ քայլեր ընդունել Փհենյանի դեմ։ Կիմ Չեն Ընին սպառնում է ճնշում նաեւ հարեւան Չինաստանի, վաղեմի դաշնակցի կողմից։

Global Times-ը անթաքույց նախազգուշացնում է, որ Չինաստանը կփակի նավթի փականը․ «Եթե Հյուսիսային Կորեան իրականացնի վեցերորդ միջուկային փորձարկումը՝ Պեկինը կաջակցի ՄԱԿ-ի ավելի կոշտ միջոցառումները, այդ թվում նավթային էմբարգոն»։ Չինաստանի կառավարությւոնից պահանջում են ավելի կոշտ դիրքորոշում զբաղեցնել Փհենյանի հարցում։ Բանն այն է, պարզաբանում է նա, որ Հյուսիսային Կորեան հիմնականում Չինաստանից է ստանում վառելիք ։

«2015-ին Հյուսիսային Կորեան Չինաստանից ներմուծել է 525 հազար տոննա հում նավթ։ Բացի դրանից Փհենյանը ստացել է 218 տոննա զտված նավթ ու բենզին՝ վեց անգամ շատ, քան Ռուսաստանից։ North Korean Economy Watch մասնագիտացված ինտերնետային ռեսուրսի տվյալներով երկրում կան մոտ 240 հազար մարդատար մեքենաներ՝ բոլորը չինական արտադրության»,- ասվում է հոդվածում։

Հյուսիսային Կորեայի միջազգային առեւտրի շրջանառությունը 2016-ին աճել է մինչեւ 6մլրդ դոլար նիշի։ Դրանից 5․5 մլրդ դոլարը, այսինքն 91․5 տոկոսը, բաժին է հասնում Չինաստանի հետ առեւտրին։ «Ստացվում է , Կիմը ամբողջովին կախված է Չինաստանի հետ առեւտրից։ Հնդկաստանին, որի հետ շրջանառությունը կազմում է 140 մլն դոլար, հետեւում է Ռուսաստանը՝ Փհենյանի վաղեմի դաշնակիցը՝ 76 մլն դոլար շրջանառությամբ»,- գրում է հոդվածագիրը։

«Լինելով խոշորագույն առեւտրային գործընկեր ու էներգառեսուրսների մատակարար՝ Պեկինը իր ձեռքերում է կենտրոնացրել Փհենյանի վրա տնտեսական ճնշման բոլոր լծակները։ Պեկինը 2006-ից սկսած, երբ Փհենյանը առաջին անգամ խախտեց համապատասխան բանաձեւը, իրականացնելով առաջին միջուկային փորձարկումը, աջակցում է ՄԱԿ-ի բոլոր պատժամիջոցները։ Այդուհանդերձ, Չինաստանի ու Փհենյանի միջեւ առեւտուրը շարունակում է բարգավաճել,- նշում է հեղինակը,- Ու միայն 2017-ի սկզբին Պեկինը կարծես սկսել է իրականացնել իր պատժամիջոցային խոստումները»։

«Այս տարվա փետրվարին Չինաստանը մինչեւ 2017 թ վերջ դադարեցրել է անտրացիտի ներմուծումը Հյուսիսային Կորեայից ։ Ապրիլի 7-ին մաքսային ծառայությունները պահանջել են, որ բոլոր հյուսիսկորեական բեռնանավերը, որոնք գտնվում են չինական նավահանգիստներում ու դեռ բեռնաթափված չեն, հետ վերադարձվեն։ Դա տեղի է ունեցել այն օրը, երբ ԱՄՆ նախագահ Դոնալդ Թրամփը Ֆլորիդայում Չինաստանի նախագահ Սի Ցզինպինի հետ հանդիպման ժամանակ պայմանավորվել է Փհենյանի հետագա սպառազինմանը խոչընդոտելու մասին»,- ասվումէ հոդվածում։

Բացի դրանից, գրում է հեղինակը, Պեկինն արգելել է պաշտոնական տուրերը դեպի Հյուսիսային Կորեա, իսկ հիմա Փհենյանի վրա ճնշում գործադրելու ու նրան բանակցությունների սեղանի շուրջ նստեցնելու համար մտադիր է դադարեցնել նաեւ նավթի ու բենզինի մատակարարումները։

 NEWS.am