ՀՀ քաղաքացիներին ԵՄ երկրներից հարկադիր կերպով վերադարձնում են Հայաստան

«168 ժամը» գրում է. «Եվրամիության անդամ երկրներից ՀՀ քաղաքացիների հարկադիր վերադարձի տեմպերը ԵՄ երկրներում միգրացիոն քաղաքականության խստացման և Հայաստանում անցած տարի տեղի ունեցած փոփոխությունների արդյունքում չեն թուլանում։ Այս տարվա ընթացքում սա արդեն երկրորդ չարթերն է։

Այժմ հետ են ուղարկվում նաև նախկինում քաղաքական ապաստան ստացած ՀՀ քաղաքացիները, քանի որ քաղաքական ապաստանի հարցը քննվում է 3 տարին մեկ անգամ, իսկ 2018-ին ՀՀ-ում փոփոխությունից հետո Հայաստանը ԵՄ ան­դամ երկրների կողմից դիտարկվում է որ­պես ապահով և ժողովրդավարական եր­կիր: Իսկ 2014 թվականից ուժի մեջ մտած Հայաստան-Եվրամիություն հետընդունման համաձայնագրով մեր երկիրը պար­տավոր է նույնականացնել ու հետ ընդու­նել իր այն քաղաքացիներին, ովքեր ԵՄ երկրներ մուտքի կամ բնակության պայ­մաններն են խախտել:

Հարկադիր ձևով եվրոպական երկրներից հայրենիք վերադարձողները մեծամա­սամբ գտնվում են սթրեսային վիճակում: Միգրացիոն ծառայությունում բացվել է Վե­րադարձ և վերաինտեգրում բաժին: ՀՀ միգրացիոն ծառայության հանրային կապերի պատասխանատու Նելլի Դավթյանը մեր թղթակցին տեղեկացրել է, որ մշակ­վում է հրատապ աջակցության ծրագիր, որ գիշերային ժամերին չարթերային թռիչքնե­րով հարկադիր վերադարձի ենթարկված անձանց կարողանան գոնե 1 ամսով ապա­հովել ժամանակավոր կացարանով, զբաղ­վածության խնդիր լուծել, և այլն:

Միգրացիոն ծառայության աշխատակի­ցը հաստատել է, որ ԵՄ կոշտ քաղաքակա­նությունը չի շրջանցում նաև քաղցկեղով տառապող անձանց, որոնք մեկնում են հիմնականում Գերմանիա և ապաստան հայցում՝ բուժօգնություն ստանալու ակնկալիքով. «Մենք խորհուրդ ենք տալիս չընտրել այդ ճանապարհը՝ չգնալ ու հանձնվել՝ հույս ունենալով, թե այնտեղ ավելի լավ կյանք է լինելու կամ լիարժեք բուժում են ստանալու, դա ֆանտաստիկա­յի ժանրից է:

Գերմանացի գործընկերները բազմիցս զգուշացրել են՝ որպես հումանի­տար օգնություն դեպորտ չեն անում միայն նրանց, որոնք ճանապարհին կմահանան, այսինքն՝ եթե բժիշկները երաշխավորում են, որ մարդը կարող է ճանապարհ անցնել, կհասնի Հայաստան, ուղարկում են: Այն անձանց, որոնք որևէ հ/կ ծրագրից չեն կա­րողանում օգտվել, ունեն բժշկական խնդիրներ, Միգրացիոն ծառայությունն այդ դեպքերում միջնորդագրեր է գրում Առողջապահության նախարարություն, փորձում ենք անհատական ձևով ընթացք տալ, մինչև կունենանք ընդհանուր կատեգորիան ու կհասկանանք՝ ինչպես ենք վար­վում»»,-գրում է թերթը:

Մանրամասները՝ թերթի այսօրվա համարում: