Վրաստանում վթարից տուժած երկու քաղաքացիների հարազատները դեմ են եղել նրանց տեղափոխմանը

Երևան- Բաթում ուղեւորափոխադրոմ իրականացնող միկրոավտոբուսի` Վրաստանում տեղի ունեցած վթարից տուժած ուղեւորներից երեքը տեղափոխվել են Երեւան:

«Հայաստանից ժամանած ռեանիմոբիլները րոպեներ առաջ մեկնարկեցին իրենց երթը Թբիլիսիից դեպի Հայաստան։ Նրանք տեղափոխում են 2 տուժածի, ինչպես նաև մի քաղաքացու, ով դուրս էր գրվել, սակայն ժամեր անց նրա զգացողությունը վատացել էր», - հայտնել է Վրաստանում ՀՀ դեսպանությունը։

Ռեանիմոբիլները Երեւան են հասել վաղ առավոտյան. տուժածներից Լենա Մ.-ն տեղափոխվել է ՀՀ Երևանի «Էրեբունի» ԲԿ, իսկ Աննա Ա.-ն՝ «Սուրբ Գրիգոր Լուսավորիչ» ԲԿ:Նրանց վիճակը, ԱԻՆ-ի փոխանցմամբ, գնահատվում է ծանր:

Ինչպես արդեն տեղեկացրել ենք` օգոստոսի 31-ին, ժամը 08:44-ին Վրաստանի ՆԳՆ ԱԻ դեպարտամենտի օպերատիվ հերթապահից տեղեկություն է ստացվել, որ ժամը 03:10-ի սահմաններում Գուգութի-Մառնեուլի ավտոճանապարհի 4-րդ կմ-ին տեղի է ունեցել ՃՏՊ. բախվել են «Mercedes Sprinter» և «Ford Transit» մակնիշների ավտոմեքենաները:

Վթարի հետեւանքով զոհվել է երկու քաղաքացի`1966 թ. ծնված Գրետան ու 1991 թ. ծնված Մարտան, տուժել 16 ՀՀ քաղաքացի:

«Տուժած ՀՀ քաղաքացիներից 7-ը (Լենա Մ., Գայանե Բ., Տաթևիկ Գ., Լաուրա Խ., Հասմիկ Ա., Անուշ Մ., Մերի Մ.) հոսպիտալացվել են Վրաստանի Հանրապետության Թբիլիսի քաղաքի «Նյու Հոսպիտալ» ԲԿ, 3-ը՝ (Աննա Ա., Վարդան Հ., Ազատ Ա.) «Պինեո» ԲԿ, մյուս 3-ը՝ (Լիլիա Խ., Զավեն Խ., Լաուրա Ս.) «Պատրիարքներ» ԲԿ, ևս 3-ը՝ (Դավիթ Ք., Կարեն Ք. և Գառնիկ Գ.) «Արամյանց» ԲԿ:

Տուժածները՝ Լենա Մ.-ն, Գայանե Բ.-ն, Տաթևիկ Գ.-ն և Աննա Ա.-ն առայժմ գտնվում են Վրաստանի Հանրապետության Թբիլիսի քաղաքի «Նյու Հոսպիտալ» և «Պինեո» բժշկական կենտրոններում: Գայանե Բ.-ի և Տաթևիկ Գ.-ի առողջական վիճակը գնահատվել է ծայրահեղ ծանր, Աննա Ա.-ինը և Լենա Մ.-ինը՝ ծանր, մյուսները, ստանալով համապատասխան բուժօգնություն, դուրս են գրվել:

ՀՀ առողջապահության նախարարության ներկայացուցիչը հաղորդեց, որ Թբիլիսի քաղաք է մեկնել 4 ավտոմեքենա (ռեանիմոբիլ)»։

Վրաստանում ՀՀ դեսպանությունից հայտնում են, որ Վրաստանի հիվանդանոցներում շարունակում են մնալ երկու տուժած, որոնց հարազատները տեղափոխման համաձայնություն չեն տվել։

Աղբյուր` Փաստինֆո