Մեր արոտները ստիպողաբար են վաճառվել «Լիդիանին». Գնդեվազի բնակիչը պատրաստ է հետ վերադարձնել 4 մլն դրամը

Ամուլսարի հանքի շահագործման արդյունքում վնաս չի պատճառվի Ջերմուկի ջրերին։ Այս մասին այսօր՝ օգոստոսի 23–ին Ջերմուկում Ամուլսարի հանքավայրի շահագործման դեմ բողոքի ակցիա իրականացնող բնակիչներին ասաց վարչապետի մամուլի խոսնակ Վլադիմիր Կարապետյանը։

«Մասնագետների հետ եմ խոսել, ասում են, ջուրը, որտեղից որ գալիս է, շատ ավելի բարձր է գտնվում, քան հանքը, հնարավոր չէ, որ որևէ բան կպնի ջրերին, հականու՞մ եք»,–դիմելով բնակիչներին, ասաց Կարապետյանը։

Բնակիչները նշեցին, որ իրենց ստիպել են վաճառել իրենց հողերը հանքի տարածքի համար։

Մասնավորապես Գնդեվազ համայնքի բնակիչ Վարդան Պողոսյանը հայտնեց, որ 4 մլն դրամով «Լիադիան» ընկերությանն է վաճառել է 7000 մ տարածքը։

«Մեր արոտները՝ 2000 հա ստիպողաբար վաճառվել է Լիդիանին։ Եթե 4 մլնը չես վերցնում, ուրեմն գերակա շահ են ճանաչում ու ձրի ձեռիցդ վերցնում են։ Ժողովրդին տոչնի չեն ասել իրենց գլխի գալիքը, թե ինչ է լինելու ձեր գլխին։ Այսօր ենք մենք տեսնում, թե ինչ է կատարվել Գնդեվազի տարածքում. մենք դեմ ենք և վերջ»,-ասաց բնաիչը։

Պողոսյանը դժգոհեց, որ «Լիդիանը» Կեչուտի ջրամբարից ջուր է վերցրել և թույլ չի տալիս, որ 9 համայնքների այգիներ ոռոգեն։

Կարապետյանն էլ հակադարձեց. «Կարո՞ղ ես ինձ ստիպելով իմ հողը վերցնես։ Ուրեմն Երևանում իսկապես ստիպելով հող են վերցրել, հիմա դատարանում կարողացել ա հաղթել և 1 մլն դոլար է ստանալու: Բա դա ստիպելո՞ւ բան ա»:

Ի պատասխան՝ Գնդեվազի բնակիչն ասաց, որ եթե իր հողը բերեն նախկին տեսքին, նույն պահին 4 միլիոնը հետ կվերադարձնի «Լիդիանին»։

Ավելի վաղ տեղեկացրել էինք, որ առավոտյան Նիկոլ Փաշինյանը ՀՀ տարածքային կառավարման և ենթակառուցվածքների նախարար Սուրեն Պապիկյանի հետ մեկնել է Ջերմուկ, որտեղ շրջում է տներով ու Ամուլսարի հանքի շահագործման թեմայով առանձին զրույցներ ունենում բնակիչների հետ։