Կա ամենօրյա մանիթորինգ, պիտի հասկանանք՝ այդ հանքն ինչ ազդեցություն ունի հողի, ջրի, աղմուկի վրա. Փաշինյանը՝ Ջերմուկի բնակչուհուն

«Կոմպետենտ մարդիկ բերում ենք, հետո ասում են, որ չէ՝ սա ոնց որ կոմպետենտ չէր:

ՀՀ վարչապետ Նիկոլ Փաշինյանը Ջերմուկում շրջում է քաղաքացիների բնակարաններով: Առաջինն այցելեց ԱՄՆ-ից ՀՀ ժամանած Գոհար Հունանյանի տուն:

«Վերադարձել ու հաստատվել եմ ՀՀ-ում՝ Ջերմուկում, որովհետև էկոլոգիապես մաքուր տեղ եմ եկել ապրեմ: Ուզում եմ, որ այս մաքուր, անարատ բնությունը պահպանվի: Շատ ընկերներ ունեմ, որ ուզում են գալ Հայաստան: Այս տանից ամբողջ սարը՝ Ամուլսարը, քաղաքը երևում է: Չեմ ուզում գամ մի տեղ, որտեղ բնությունը ապականվում է»,- ասաց Գոհար Հունանյանը:

Վարչապետ Նիկոլ Փաշինյանը համաձայնեց կնոջ հետ, բայց նկատեց, որ հարց է՝ արդյո՞ք Ամուլսարի հանքի շահագործումը վտանգել է բնությունը: Ի պատասխան վարչապետի՝ Գոհար Հունանյանն ասաց, թե կոմպետենտ մարդիկ պետք է բերվեն, որ այս հարցին պատասխան տրվի:

«Կոմպետենտ մարդիկ բերում ենք, հետո ասում են, որ չէ՝ սա ոնց որ կոմպետենտ չէր: Ավելի կոմպետենտ մարդիկ ենք բերում, հետո էլի ասում են, որ չէ՝ սա էլ այն չէ: Հիմա աշխարհի բոլոր կոմպետենտ մարդկանց պիտի հավաքենք, որ հասկանանք: Մեր նախընտրական ծրագրում էլ է գրած, որ ՀՀ-ն էկոհամակարգի կոնցեպտով պիտի:

Ենթադրենք, որ հանքը աշխատեց, պիտի հասկանանք՝ այդ հանքն ինչ ազդեցություն ունի հողի, ջրի, աղմուկի վրա: Այդ պուճուր սարի վրա մինչ հեղափոխությունն արդեն 400 մլն դոլար է ծախսվել: Ինձ զեկուցել են, որ կա ամենօրյա, ամենշաբաթյա ու ամսվա մոնիթորինգ: Խումբը՝ կազմված քաղհասարակությունից, կառավարության ներկայացուցչից, փորձագետներից, ընկերության ներկայացուցիչներից, ամեն օր խոտը վերցնելու է, որ տանի լաբորատորիա: Եթե պարզվի, որ խոտի վրայի փոշին նախատեսվածից շատ է, ապա 90 օր է տրվում խնդիրը կարգավորելու համար: Եթե խնդիրը չի վերացվում, ապա պետությունն ունի հանքի շահագործումը դադարեցնելու իրավական հիմք»,- մանրամասնեց Նիկոլ Փաշինյանը:

Գոհար Հունանյանը խնդրեց վարչապետին իրենց հուսախաբ չանել, քանի որ հավատում է Նիկոլ Փաշինյանին: