Քաղաքապետարանում չեն տիրապետում «Սանիթեք»-ի հետ կնքված պայմանագրի դրույթներին. Խաժակյան

Քաղաքապետարանը մշտապես խուսափում է պատասխանել հարցին՝ «Սանիթեք»-ն իրավունք ունի՞ միակողմանի խզել Երևանի քաղաքապետարանի հետ կնքված պայմանագիրը: Լրագրողների հետ զրույցում այս մասին ասաց Երևանի ավագանու «Լույս» խմբակցության անդամ Դավիթ Խաժակյանը:

«Տեսականորեն պատկերացրեք՝ «Սանիթեք»-ը չի իրականացնում սանմաքրումը և ունի մեկ մեքենա, բայց ինքը չի հրաժարվում յուրաքանչյուր ամիս վճարվելիք գումարներից, որի վերաբերյալ երեկ Երևանի քաղաքապետարանը բնակիչներին տեղեկացրեց՝ չնայած այդ վատ սպասարկմանը, իրենք շարունակում են վճարել «Սանիթեք»-ին: Ի՞նչ է լինելու: Քաղաքապետարանը ինչ-որ պահի ստիպված է լինելու այդ քայլն իրականացնել: Եթե դրա կամքը չկա, նշանակում է՝ և՛ մենք բոլորս պետք է տուժենք քաղաքի վիճակի առումով, և՛ 5,2 մլրդ դրամ քաղաքը շարունակելու է վճարել «Սանիթեք»-ին»,-ասաց Խաժակյանը:

Նրա խոսքով՝ երբ սկսեցին տուգանքների կիրառումը, հասկանալի էր, որ կազմակերպությունը՝ հատկապես տուգանքների կիրառման պարագայում ներդրումներ չի իրականացնելու:

Հարցին՝ հնարավո՞ր էր քաղաքապետարանի կողմից խզել «Սանիթեք»-ի հետ պայմանագիրն այն ժամանակ, երբ չկային տույժեր, Խաժակյանը կարծիք հայտնեց, որ քաղաքապետարանը կարող է դա անել, այդ թվում՝ հիմա. «Մեկ բան հասկանալի է: Քաղաքապետարանում այդ պայմանագրի հիմնադրույթներին չեն տիրապետում և դրա վառ վկայությունն այն է, որ ամիսներ առաջ Հայկ Մարությանը հայտարարեց, որ կա՛մ «Սանիթեք»-ը պետք է հրաժարվի սանմաքրում իրականացնելու պարտավորությունից, կա՛մ կիրառվելու են տույժ-տուգանքներ: Պայմանագրում սանմաքրումը «Սանիթեք»-ի պարտավորությունն է. պետք է պայմանագիրը լուծվեր ամբողջությամբ, չէր կարող հանվեր մեկ պարտավորություն, դա կհակասեր գնումների օրենսդրությանը»:

Խաժակյանը կարծում է, որ «Սանիթեք»-ն իր ունեցած ռեսուրսներով չի կարող սպասարկել Երևանն ամբողջ ծավալով. «Կազմակերպությունը ակնկալիք ուներ քաղաքապետարանից՝ օգնության տեսքով, որը քաղաքապետարանը օբյեկտիվ կամ սուբյեկտիվ պատճառներով չի տրամադրել: Հիմա քաղաքը աղբահանության առումով ինքնահոսի մեջ է: Տեսնում ենք, որ այնուամենայնիվ, աշխատանքներ իրականացվում են, սակայն դրանք չեն լինում ամբողջ ծավալով»:

Բաժանորդագրվեք Top-News.am-ին Telegram-ում