Մայքլ Փենս. Հյուսիսային Կորեան «ցանկացած հարձակման» դեպքում «ջախջախիչ պատասխան» կստանա

ԱՄՆ փոխնախագահ Մայքլ Փենսը հայտարարել է, որ Հյուսիսային Կորեան այլ երկրի վրա «ցանկացած հարձակման» դեպքում «ջախջախիչ պատասխան» կստանա: Հայտարարությունը կատարվել է ամերիկյան «Ռոնալդ Ռեյգան» ավիակրի տախտակամածին, որը կառանված է Ճապոնիայի Յոկոսուկա նավահանգստում, հայտնում է AFP-ն:

«Նրանք, ովքեր ցանկանում են վիճարկել մեր վճռականությունը եւ պատրաստականությունը, պետք է իմանան, որ սովորական կամ միջուկային զենքի ցանկացած կիրառում կկործանվի Ամերիկայի ջախջախիչ եւ արդյունավետ պատասխանով»,- նշել է նա:

«Հորիզոնում մեծ ամպեր են կուտակվել»,- պատկերավոր արտահայտվել է Փենսը՝ խոսելով Դոնալդ Թրամփի «վերջնագրին» ենթարկվելու Հյուսիսային Կորեայի իշխանությունների հրաժարվելու մասին:

Հիշեցնենք, որ ապրիլի 16-ին հայտնի է դարձել, որ Հյուսիսային Կորեան կատարել է հրթիռային հերթական փորձարկումները: Փորձարկումներից առաջ մի քանի օր Վաշինգտոնը եւ Փհենյանը կոշտ հայտարարություներ են փոխանակել, որը հասել է նրան, որ ապրիլի 11-ին Դոնալդ Թրամփը խոստացել է «հյուսիսկորեական խնդիրը լուծել»:

«Հյուսիսային Կորեան անախորժություններ է փնտրում: Եթե Չինաստանը որոշի օգնել, դա հրաշալի կլինի: Եթե ոչ, մենք խնդիրն ինքներս կլուծենք՝ առանց նրանց: ԱՄՆ»,- ԱՄՆ նախագահը «Թվիթերի» միջոցով նման ուղերձ է հղել Հյուսիսային Կորեային եւ ամբողջ աշխարհին:

news.am