Հուսանք Ռոբերտ Քոչարյանի դեմ հարուցված քրգործով ՍԴ-ն կընդունի որոշում, որն այս կատակերգության վերջը կտա․ ֆրանսահայ փաստաբան

Եվրոպական տեսակետից այս քրեական վարույթն այլևս ավարտված է և այս գործի յուրահատկությունը նրանում է, որ քաղաքական գործընթաց է․ այսօր հրավիրված ասուլիսին նման տեսակետ հայտնեց ֆրանսահայ փաստաբան Սևակ Թորոսյանը՝ անդրադառնալով ՀՀ երկրորդ նախագահ Ռոբերտ Քոչարյանի դատավարությանը։

Ըստ նրա, վարչապետն էր պահանջել Քոչարյանի կալանավորումը։ «Չգիտեմ ով է պահանջել դատավորի նկատմամբ խուզարկության գործընթացը. սա իրապես քաղաքական խնդիր է»,-ասաց նա։

Փաստաբանը նշեց, որ այս դատավարության մեկ տարվա ընթացքում ՄԻԵԴ-ի խարտիայի նկատմամբ շատ ոտնձգություններ են տեղի ունեցել, բայց դրա գագաթնակետը եղավ այն պահը, երբ դատավորը թույլ չտվեց փաստաբանին ելույթ ունենալ։

«Դատախազը պահանջեց պարոն Քոչարյանի կալանավորումը, մեղադրյալն ունեցավ իր խոսքի իրավունքը, և երրորդ էտապը պաշտպանի խոսքն էր, իսկ դատավորն արգելեց նրան խոսք վերցնել։ Նույնիսկ դիկտատուրաններում նման բան գոյություն չունի, որովհետև դիկտատուրայի պարագայում բոլորը խաղում են իրենց դերը այդ կատակերգության մեջ, բայց այն, ինչ տեղի ունեցավ ՀՀ-ում, պատմական նշանակության էր, և քրեական դատավարությունը իմաստազրկվեց»,-ասաց նա։

Ֆրանսահայ փաստաբանը նշեց, որ Քոչարյանի այս մեկ տարվա դատավարության ընթացակարգին հետևելով՝ խախտումների 4 հիմնական փուլ են արձանագրել։

Ըստ նրա, առաջինը Քոչարյանի կալանավորումն էր՝ ելնելով հեռախոսային խոսակցություններից։

«Դատավորին պարտադրվեց պարոն Քոչարյանի խափանման միջոց ընտրել կալանավորումը. ուզի դատավորը, թե ոչ՝ դա առաջին փուլն էր։ Երկրորդ փուլն այն էր, երբ կալանքից ազատումից հետո եղավ վարչապետի հրահանգը դատարանների դռները փակելու, որն ուղիղ ազդեցություն էր իրավական համակարգի վրա»,-ասաց նա: Սևակ Թորոսյանը նշեց, որ երրորդ փուլը փաստաբանի ելույթ չունենալն էր և չորրորդը, որը նա բնորոշեց որպես զառանցանքի հասնող փուլ, դա վարույթ սկսելն էր այն դատարանի նկատմամբ, որը կալանքից ազատել էր Քոչարյանին»,-ասաց նա։

Փաստաբանը նշեց, որ իրավիճակը լույս է սփռում այնպիսի դատավարական իրավիճակի վրա, որը կարծում են, որ ավարտվել է. «Բայց այս ընթացակարգը դեռևս ավարտված չէ և այս չորս փուլերից յուրաքանչուրը հետևանք պետք է ունենար՝ նվազագույնը պատասխանատու անձանց տվյալ գործից ազատում, բայց ինձ թվում է, թե ՀՀ-ում բոլորը քնած են։ Դժվարությամբ եմ հասկանում մարդկանց իներտ վիճակն այսօր»,-ասաց նա։

Սևակ Թորոսյանը կարծիք հայտնեց, որ առաջիկայում կլինի անկախ դատավորների և ստրուկ դատավորների միջև պայքար. «Փորձ է արվել վախեցնել դատավորներին, և կտեսնենք անկախ դատավորների դիմադրությունն այս իրավիճակին: Կա՛մ այդ անկախ դատավորների պայքարը կհաղթանակի, կա՛մ ես որևէ ապագա չեմ տեսնում»,- ասաց նա։

Փաստաբանը հույս հայտնեց, որ կարիք չի լինի այս գործով ՄԻԵԴ-ի որոշում ունենալ ՀՀ-ի վերաբերյալ։ «Հուսանք ՍԴ-ն կընդունի որոշում, որն այս կատակերգության վերջը կտա»,-ասաց նա։