«36 հոգի պետք է բերման ենթարկեին, մյուսներն ո՞ւր են». Փաշինյանը՝ Իջեւանի դեպքերի մասին

Երեկ Իջեւանում անթույլատրելի զարգացումներ են տեղի ունեցել. ապօրինի ծառահատումներով զբաղվող քաղաքացիների կողմից կազմակերպված ակցիայի մասնակիցները չեն ենթարկվել ոստիկանների օրինական պահանջներին եւ մարմնական վնասվածքներ են հասցրել ոստիկաններին: Այս մասին այսօր՝ հուլիսի 18-իօն, կառավարության նիստի սկզբում հայտարարեց ՀՀ վարչապետ Նիկոլ Փաշինյանը՝ հավելելով, որ 12 ոստիկան ստացել է մանրմական վնասվածք, բարեբախտաբար ոչ շատ ծանր:

«Երկու քաղաքացի է մարմնական վնասվածք ստացել: Այսպիսով ապօրինի ծառահատումներ իրականացնող անձինք փորձել են ապօրինի պայմաններ պարտադրել կառավարությանը: Կառավարությանն ապօրինի պայմաններ պարտադրելու որեւէ փորձ արժանանալու է ամենակոշտ հակազդեցության»,-ասաց նա՝ առաջարկելով փոխոստիկանապետ Վարդան Մովսիսյանին, ով քիչ առաջ է վերադարձել Իջեւանից, մանրամասներ հայտնել:

Վերջինս նշեց հետեւյալը. ««Ապօրինի ծառահատումների կանխման շրջանակներում միջոցառումներ էին իրականացվում Լոռու եւ Տավուշի մարզերում: Տեղավորվել էին անշարժ պահակակետեր այն կարեւոր ուղիներում, որտեղով կարող էինարտահանել ապօրինի հատված ծառերը: Դա դժգոհություն էր առաջացրել այդ հատվածի մոտ, որոնք զբաղվում են ապօրինի ծառահատումներով: Նրանք փողոց փակելու միջոցով ուզում էին իրենց հարցերը կարգավորեն: Այդ առթիվ երեկ Իջեւանում մի քանի անգամ փակվեց եւ բացվեց Իջեւան-Նոյեմբերյան մայրուղին եւ Իջեւանի Երեւանյան փողոցը: Մոտ 500 հոգու կողմից պահանջ էր դրվում, որ հանեն այդ պահակակետերը եւ թույլ տան իրենց ապօրինի ծառահատված զանգվածը հանել մարզից: 18.00-ի սահմաններում ոստիկանությունը պատնեշ էր կազմել եւ ուզում էր բացել մայրուղին: Այդտեղ տեղի ունեցավ բախում:

Բողոքավոր հատվածը քարերով, մահակներով վնասվածքներ պատճռեցին 11 ոստիկանների: Վնասվածքները լուրջ չեն, այս պահին 8 ոստիկան ոստիկանական հոսպիտալում է, վիճակը բավարար է»,-ասաց նա:

Մովսիսյանը նշեց, որ ոստիկանապետ Վալերի Օսիպյանի հանձնարարությամբ ոստիկանական զորքերի մի մասը տեղափոխվել է Իջեւան. «Բանակցություններ վարվեցին ակտիվիստների հետ, որի ընթացքում ներկայացվում էին նույն պահանջները: Ոստիկանապետը բացառեց որեւէ ձեւով այդ հարցի անօրինական որեւէ լուծում: Հիմա իրավիճակը վերահսկվում է, մայրուղիները բաց են:Լ Ոստիկանապետը այնտեղ է: Հարուցվել է քրեական գործ խուլիգանության եւ իշխանության ներկայացուցչի նկատմամբ բռնություն գործադրելու հոդվածների հատկանիշներով: 19 մարդ բերման է ենթարկվել, որից 13-ը ձերբակալվել է, մնացածը ստորագրությամբ բաց են թողնվել»:

Փաշինյանը նկատեց, որ ինքը տեղյակ էր, որ շուրջ 36 հոգի բերման պետք է ենթարկվեր, որոնք կազմակերպիչներն են: «Տվյալ դեպքում ակտիվիստ բառն այնքան էլ պատեհ չի: 36 հոգի պետք է բերման ենթարկեին, մյուսներն ուր են»:

Փոխոստիկանապետը պատասխանեց, որ գիշերն օպերատիվ գործողություններ են իրականացվել. «Բոլորի հասցեներով գնացել են, որ բերման ենթարկեն յդ անձանց, որոնց ցուցակն ունեինք: Բայց նրանց տեղում չեն գտել, հիմա աշխատանքները շարունակվում են նրանց հայտնաբերելու: Այդ թվից 19-ն են բերման ենթարկվել»,-ասաց նա՝ բացառելով, որ նրանք հնարավոր է հանրապետությունից դուրս եկած լինեն:

«Հիմա ուժեղացված հսկողություն է իրականացվում, եւ հնարավոր է դժգոհություն առաջացնի նաեւ այդ հանգամանքը, որ մի քանի հոգու բերման են ենթարկել ու ձերբակալել: Կարող է նորից փորձեն փողոցը փակել»,-ասաց փոխոստիկանապետը: