Թուրքիայի հետ «լոլիկների պատերազմի» պատճառով Ռուսաստանը 1.5 մլրդ դոլարի վնաս է կրել

Ռուսաստանի Դաշնության նախագահին կից Ազգային տնտեսության և պետական ծառայության ռուսական ակադեմիայի, ինչպես նաև Գայդարի ինստիտուտի փորձագետների համատեղ կազմած զեկույցում նշվում է, որ Թուրքիայի հետ «լոլիկների պատերազմի» պատճառով Ռուսաստանը 1.5 մլրդ դոլարի վնաս է կրել:

Ոլորտի վերլուծաբանները նշում են, որ նախքան թուրքական գյուղատնտեսական ապրանքների ներկրման նկատմամբ պատժամիջոցների սահմանումը, ռուսական շուկա ներկրվող լոլիկների 43%-ը թուրքական է եղել:

Մասնագետները նշում են, որ ստեղծված իրավիճակում ռուս սպառողը տուժողի դերում է: Խանութներում լոլիկի վաճառքի գինը եռակի գերազանցում է ներկրման գնին: Մինչդեռ Ռուսաստանում ջերմոցային պայմաններում աճեցվող լոլիկը շատ ավելի թանկ է ներկրվող լոլիկի միջին գնից:

Աղբյուրը հիշեցնում է, որ Ռուսաստանը 2016թ. սկզբին մի շարք պատժամիջոցներ է սահմանել Թուրքիայի դեմ՝ արգելելով որոշ գյուղատնտեսական մթերքների ներկրումը: Նշվում է, որ դա արվել է Սիրիայի տարածքում ռուսական Սու-24 ռազմական օդանավի դեմ թուրք զինվորականների կողմից իրականացված հարձակմանն ի պատասխան:

Թուրքիան, իր հերթին, մարտին մաքսատուրքեր է սահմանել ռուսական ցորենի ներկրման համար և փաստացի արգելել այդ երկրից գյուղատնտեսական արտադրանքի ներկրումը:

tert.am