Օրհներգի փոփոխության հարցը հերթական շոո՞ւն էր

«Իրատես»-ը գրում է․

«ԱԺ փոխնախագահ Ալեն Սիմոնյանի՝ դեռ ամիսներ առաջ նախաձեռնած օրհներգի փոփոխության գործընթացից ձայն-ծպտուն չկա: Արամ Խաչատրյանի երաժշտությամբ հիմնի համար հայտարարվել էր տեքստի մրցույթ: Համապատասխան տեքստ ընտրելու համար ձևավորվել էր աշխատանքային խումբ՝ Դավիթ Գյուրջինյանի, Ֆելիքս Բախչինյանի, Էդվարդ Միլիտոնյանի, տեր Ասողիկի և այլոց մասնակցությամբ:

Թե ինչ աշխատանքներ է իրականացնում այդ խումբը, մինչ այս պահն անհայտ է: Հայտնի չէ նաև՝ արդյո՞ք եղել են մարդիկ, որ տեքստ են գրել ու ներկայացրել մտավորականների դատին:

Ի դեպ, աշխատանքային խմբի մեջ գտնվողներից ոմանք դրա ստեղծման ժամանակ անգամ տեղյակ չէին, որ պետք է օրհներգի փոփոխությամբ զբաղվեն:

Լեզվի տեսչության պետ Դավիթ Գյուրջինյանի կարծիքով, օրինակ, օրհներգը փոխելու ժամանակը չէր:

Հստակ չէր նաև՝ աշխատանքային խումբը պետական ի՞նչ կառույցի ենթակայությամբ էր գործում, ո՞վ էր այդ խմբի աշխատանքների պատասխանատուն, ի՞նչ կառույց էր հանձնարարել օրհներգի փոփոխության հարցով զբաղվելու համար աշխատանքային խումբ ստեղծել և այլն:

Գուցե այն հերթական շոու՞ն էր հասարակությանն ինչ-ինչ կարևորագույն հարցերից շեղելու համար: Եթե ոչ, ապա պատասխանատուներին հիշեցնում ենք՝ աշխատանքային խմբի գործունեությունը դարձրեք հրապարակային, եթե, իհարկե, աշխատանք արվել է»։

Նյութն ամբողջությամբ կարդացեք «Իրատես»-ում։