Թրամփը բարելավում է հարաբերությունները Պեկինի հետ եւ վատացնում՝ Մոսկվայի հետ

ԱՄՆ նախագահի պաշտոնում 3 ամսից էլ քիչ անցկացնելուց հետո Դոնալդ Թրամփը կտրուկ փոխել է արտաքին քաղաքականության վեկտորը, Ռուսաստանի, Չինաստանի հետ հարաբերություններից սկսած մինչեւ ՆԱՏՕ-ի մասին իր գնահատականները, գրում են Reuters գործակալության հոդվածագրերը։

Նրանց խոսքով նախընտրական քարոզչության ընթացքում Թրամփը մշտապես քննադատում էր Չինաստանը, Պեկինին մեղադրելով արժույթի մանիպուլացումների մեջ։ Թրամփը նաեւ ՆԱՏՕ-ն անվանել էր իրեն սպառած կազմակերպություն ու Ռուսաստանի հետ հարաբերությունները հարթելու հույսեր հայտնել։ Սակայն վերջին մամուլի ասուլիսի ու հարցազրույցի ընթացքում ԱՄՆ նախագահը հակառակն էր հայտնել՝ Մոսկվայի հետ հարաբերությունները փչանում են, իսկ Չինաստանի հետ՝ լավանում։ Բացի դրանից Թրամփը նաեւ հայտնել էր, որ այլեւս ՆԱՏՕ-ն հնացած կազմակերպություն չի համարում։

Հենց Ռուսաստանի ու ՆԱՏՕ-ի հարցում դիրքորոշումների փոփոխությունն է հուսադրել եվրոպական դաշնակիցներին, բայց ահա Չինաստանի մասին հայտարարությունները, ըստ հոդվածագրերի, որոշակի տարակուսանք են առաջացրել։ Հոդվածում ասվում է, որ Թրամփի ակնհայտ տեղաշարժները դեպի ավելի ավանդական արտաքին քաղաքականություն համընկել են նրա վարչակազմի ներսում ինտրիգների բորբոքմանը՝ վերջերս նկատվում է քաղտեխնոլոգների՝ հիմնականում նրա գլխավոր ստրատեդ Սթիվ Բեննոնի ազդեցության նվազում։

Պաշտպանության նախարար՝ քաղաքական հարցերով նախկին տեղակալ Քրիստին Վորմութը համարում է, որ Թրամփը սկսել է ավելի լավ հասկանալ շատ հարցերի նրբությունները ։

Հոդվածագրերը շեշտում են, որ Թրամփի էվոլյուցիոն արտաքին քաղաքականությունը սկսել է ավելի քիչ արտահայտել նրա նախընտրական թիմի ազդեցությունը ու ավելի շատ հաշվի առնել պաշտպանության նախարար Ջեյմս Մաթթիսի, պետքարտուղար Ռեքս Թիլերսոնի ու ազգային անվտանգության հարցերով խորհրդական Մաքմասթերի տեսակետները, որոնք բոլորն էլ թերահավատորեն են վերաբերում Ռուսաստանին։

Արտաքին քաղաքականության մեջ երանգի փոփոխությունը տեղի է ունենում «Սպիտակ տան ներսում պալատական ինտրիգները կարգավորելու՝ Թրամփի փորձերին զուգահեռ», որտեղ Բեննոնը, Breitbart News պահպանողական կազմակերպության նախկին ղեկավարը, լեզու չի գտնում Ջարեդ Քուշների՝ Սպիտակ տան ավագ խորհրդականի ու Թրամփի փեսայի հետ։

 NEWS.am