Լապշինի կին. Իմ ամուսինը տախիկարդիա ունի, իսկ փաստաբանը ժխտում է

Տեղեկությունը այն մասին, որ կալանավորված բլոգեր Ալեքսանդր Լապշինը սրտի հետ կապված խնդիրներ ունի, իրականությանը չի համապատասխանում,– այսօր ասել է նրա փաստաբանը՝ Էդուարդ Չերնինը։

Փաստաբանը ավելացրել է, որ Լապշինի հետ հանդիպել, է եւ նրա ինքնազգացողության վերաբերյալ որեւէ բողոք չի ստացել։

«Այսօր Լապշինը բերվել է Բաքվի վճռաբեկ դատարան եւ մասնակցել է դատավարությանը։ Ինչպե՞ս է հնարավոր դատարան բերել մի մարդու, ով սրտի հետ պրոբլեմներ ունի եւ ում ինքնազգացողությունը նորմալ չէ։ Լապշինը ինքնազգացողության խնդիրների հետ կապված որեւէ բան չի ասել»,– նշել է փաստաբանը։

Այսպիսով, փաստաբանը հերքել է Լապշինի կնոջ խոսքերը, ով այսօր ֆեյսբուքում գրել էր, որ ամուսինը սրտի խնդիրներ ունի։
«Երեկ չէ առաջին օրը Սաշան ինձ զանգահարեց բուժկետից, ուր նրան տեղափոխել էին տախիկարդիայով,– գրել է բլոգերի կինը։ Մինչ այդ նա սրտի հետ երբեւէ խնդիր չի ունեցել։ Հիմա ունի...»։

Էդուարդ Չերնինը նաեւ նշել է, որ նրա պաշտպանյալը չի բողոքում կալանավայրի պայմաններից։ «Շաբաթը մեկ անգամ նա բուժզննում է անցնում, եւ եթե բուժման անհրաժեշտություն առաջանա, նրան օգնություն կցուցաբերեն»,– նշել է նա։

Հիշեցնենք, որ Նասիմինսկյան շրջանային դատարանի ապրիլի 7-ի որոշմամբ՝ Լապշինի կալանքի՝ որպես խափանման միջոց, ժամկետը երկարաձգվել է եւս երեք ամսով։

Top-News.am