Հայաստանը Հունաստանին երբեք չէր հաղթել

Ֆուտբոլի Հայաստանի հավաքականը պատմական հաղթանակ տարավ Հունաստանի ազգային թիմի նկատմամբ, այն էլ Աթենքում: Պատմական, քանի որ 1991թ. սեպտեմբերի 21-ից հետո հայաստանի ազգային թիմը անգամ գոլ չէր խփել հույների դարպասը, իսկ հիմա վերցրինք եւ հաղթեցինք: Ընդ որում, այն ժամանակ, երբ սպասելիքներ առանձնապես չկային:

Արդեն երրորդ րոպեին պարզ էր, որ հույները խնդիրներ ունեն: Նրանք դանդաղ էին եւ առանձնապես լուրջ չէին մոտենում մեր հավաքականին: Իսկ Հայաստանի հավաքականի պրեսինգն ու արագ հակագրոհները տվեցին իրենց արդյունքը: 

Ութերորդ րոպեին Տիգրան Բարսեղյանի փոխանցումից հետո, բավական դժվարին դիրքից հաշիվը բացեց Ալեքսանդր Կարապետյանը:

Հույներն այս գոլից հետո շարունակում էին նույն պարզագույն խաղը ցուցադրել: 32-րդ րոպեին Կամո Հովհաննիսյանի փոխանցումից հետո, խաբս տալով Սոկրատիս Պապաստաթոպուլիսին, գեղեցիկ հարվածով հաշիվը 2:0 դարձրեց շատ լավ հանդիպում անցկացրած Գեւորգ Ղազարյանը:

Առաջին խաղակեսը մի կերպ ավարտվեց: Մի կերպ, քանի որ վնասվածքների շարան սկսվեց եւ մրցավարը ստիպված ավելացրեց մոտ ինը րոպե:

Երկրորդ խաղակեսը մեր հավաքական, մեղմ ասած, վատ սկսեց: Հոգեբանորեն պատրաստ չէին: Հետեւանքը եղավ այն, որ Զեկան երկրորդ խաղակեսի իններորդ րոպեին հաշիվը դարձրեց 2:1: 

Այս գոլից հետո էլ Հայաստանի հավաքականը լավ տպավորություն չէր թողնում, եւ թվում էր, թե ուր որ է բաց են թողնելու երկրորդ գոլը: Փրկություն էր եզակի հակագրոհներից մեկի ժամանակ Տիգրան Բարսեղյանի խփած գոլը: Առաջին հարվածը հետ եկավ ձողափայտից, բայց երկրորդ հարվածով հաշիվը դարձավ 3:1:

Թվում էր, թե արդեն հաղթանակն ապահովված է, քանի որ վնասվածք ստացավ Սյոպիսը եւ հույները մնացին տասը հոգով: Չնայած այս ամենին, մեր ֆուտբոլիստները հաջողացրին մանկական գոլ բաց թողնել: Ֆորտունիսը 87-րդ րոպեին շրջանցելով  հինգ ֆուտբոլիստի եւ դարպասապահին կրճատեց հաշիվը:

Հետո մեր ֆուտբոլիստները կարող էին հաշիվը դարձնել 4:2, բայց խաղը ավարտվեց 3:2 հաշվով եւ մեր հավաքականն առաջին անգամ հաղթեց Հունաստանի ազգային թիմին եւ մրցաշարային աղյուսակում վեց միավորով բարձրացավ երրորդ հորիզոնական:

Top-News.am