ԱՄՆ-ում կես մլն-ից ավելի մարդ Մելանյա Թրամփից պահանջում է Սպիտակ տուն տեղափոխվել

Միացյալ Նահանգներում կես մլն-ից ավելի մարդ ստորագրել է խնդրագիրը, որը երկրի առաջին տիկին Մելանյա Թրամփից պահանջում է լքել նյույորքյան Trump Tower-ում գտնվող շքեղ պենտհաուսն ու որդու հետ Սպիտակ տուն տեղափոխվել:

Շարքային ամերիկացիների դժգոհությունը պայմանավորված է այն փաստով, որ նախագահի կնոջ և 10-ամյա որդու անվտանգությանն առնչվող ծախսերը բավական մեծ են ու վճարվում են հարկատուների հաշվին: Հայտնի է, որ ամեն օր Նյու Յորքի ոստիկանությունը 125.000-146.000 դոլար է ծախսում նրանց անվտանգությունն ապահովելու համար:

Change.org կայքում տեղադրված խնդրագրում կոչ է արվում ստիպել Մելանյա Թրամփին տեղափոխվել ամուսնու մոտ՝ Սպիտակ տուն, կամ էլ սեփական գրպանից վճարել անվտանգության համար պահանջվող ծախսերը:

Նշվում է, որ խնդրագիրը ստորագրել է մոտ 515.000 մարդ:

Ավելի վաղ հաղորդվում էր, որ առաջին տիկինը մինչև մայիսի վերջ չի տեղափոխվի Վաշինգտոն, քանի որ նրա որդին՝ Բարոնը, պետք է մինչև ուսումնական տարվա վերջ մնա Նյու Յորքում:

tert.am