Բենզինի ամենաբարձր գներն աշխարհում և լրագրողների ամենաշատ ձերբակալությունները. որ ոլորտներում է Թուրքիան համաշխարհային «առաջատար»

Թուրքական listelist.com կայքի սյունակագիրներից Սելիմ Գերչեքերը որոշել է պարզել, թե ինչի համար են եվրոպացիները «նախանձում» Թուրքիային և թուրքերին:

Հիշեցնելով մի շարք թուրք նախարարների և հատկապես Թուրքիայի նախագահ Ռեջեփ Թայիփ Էրդողանի մշտական պնդումներն այն մասին, թե Եվրոպան իրականում նախանձում է Թուրքիային և նրա հզորացմանը, սյունակագիրը կազմել է ցուցակ, որտեղ բացահայտում է, թե որ ոլորտներում է Թուրքիան համաշխարհային անվիճելի առաջատար:

Ցուցակը կազմելիս սյունակագիրը հիմնվել է մի շարք միջազգային կազմակերպությունների տվյալների, ինչպես նաև սեփական ուսումնասիրությունների վրա:

Ըստ Լրագրողների պաշտպանության միջազգային կոմիտեի, որի կենտրոնական գրասենյակը գտնվում է Նյու Յորքում, ամենամեծ թվով ձերբակալված և կալանավորված լրագրողները հենց Թուրքիայում են: Թուրքիայում են նաև տեղի ունեցել սեռական փոքրամասնությունների ամենաշատ սպանությունները՝ ըստ Transgender Europe կազմակերպության տվյալների:

«Իհարկե, չմոռանանք, որ աշխարհի ամենաթանկ բենզինը նույնպես Թուրքիայում է: Մեկ լիտրի համար վճարում ենք 5 թուրքական լիրա, ինչը գրեթե 1.5 դոլար է», - գրել է սյունակագիրը:

Թուրքիայի քաղաքացիները նաև աշխարհում ամենաշատն են հակաբիոտիկ դեղեր օգտագործում, ինչպես նաև առաջատար են թեյախմության հարցում: Պարզվում է՝ Թուրքիայի յուրաքանչյուր բնակիչ ամեն տարի սպառում է ավելի քան 12.54 կգ թեյ:

«Եվ այս ամենից հետո՝ բոնուս. աշխարհի ամենանախանձելի երկիրն ենք, բոլորը մեզ նախանձում են», - եզրափակել է սյունակագիրը:

tert.am