Թուրքիայի փոխվարչապետն արդարացել է, թե Իրանն իրեն սխալ է հասկացել

Թուրքիայի փոխվարչապետներից Վեյսի Քայնաքն Իրանի ԱԳՆ-ի կոշտ պատասխանից հետո հայտարարել է, որ իրանցի հարևաններն իրեն սխալ են հասկացել:

Նշենք, որ օրեր առաջ Քայնաքը հայտարարել էր, որ միլիոնավոր փախստականներ, որոնց մեծ մասն աֆղանցիներ են, շարժվում են դեպի Թուրքիա: Թուրքիայի փոխվարչապետը նաև նշել էր, թե Իրանից շուրջ 30.000 աֆղանցի 2016թ.-ի ընթացքում անօրինական ճանապարհով անցել է Թուրքիա՝ Իգդիրի և Բայազետի ճանապարհով:

Ինչպես հայտնում է թուրքական diken.com.tr կայքը՝ Քայնաքը հայտնել է, որ Իրանից միլիոնավոր աֆղանցի գաղթականների դեպի Թուրքիա շարժվելու մասին իր հայտարարությունը, հավանաբար, սխալ է թարգմանվել:

«Կարծում եմ՝ սխալ թարգմանություն է եղել: Մենք նկատի ունեինք, որ նման հոսք կարող էր լինել, սակայն մենք այն կարողացել ենք կանխել», - ասել է Քայնաքը:

Հիշեցնենք, որ Իրանը Քայնաքի հայտարարությունը որակել էր տարօրինակ ու իրականությանը չհամապատասխանող, ինչպես նաև խորհուրդ տվել Թուրքիային «մարդկային խնդիրները չբերել միջազգային քաղաքականություն»:

«Իրանը մոտ 30 տարի է, ինչ հարևան երկրներից միլիոնավոր ներգաղթյալներ է հյուրընկալում: Իրանն այս ամբողջ ընթացքում մարդկային այս խնդիրը երբևէ չի օգտագործել քաղաքական նպատակներով: Թուրքիան պետք է հենց մեզանից սովորի նման մոտեցումները, ինչպես նաև հարևան երկրների՝ հատկապես Սիրիայի և Իրաքի տարածքային ամբողջականության հանդեպ հարգանք դրսևորելը», - ասվում է Իրանի ԱԳՆ-ի պաշտոնական հայտարարության մեջ:

Tert.am