Պորտուգալիան՝ կախարդական շրջանում

Ֆուտբոլի Պորտուգալիայի ազգային թիմը գեղեցիկ եւ դիտարժան ֆուտբոլ է ցուցադրում, բայց երկրորդ խաղն անընդմեջ չի կարողանում հաղթել՝ ունենալով մեծ առավելություն, ստեղծելով գոլային բազմաթիվ պահեր:

Եվրոպայի առաջնության ընտրական մրցափուլի երկրորդ խաղում, ինչպես առաջինում Պորտուգալիան մեծ առավելություն ուներ Սերբիայի դեմ, բայց ինչպես չհաղթեցին ուկրաինացիներին, այդպես էլ չհաղթեցին սերբերին: Տարբերությունը միայն այն է, որ եթե առաջին խաղում գոլեր չեղան, ապա այս խաղում թիմերը մեկական գոլ խփեցին: Ավելին, առաջին խաղակեսում վնասվածք ստացավ եւ փոխարինվեց Ռոնալդուն:

Առաջին գոլը 7-րդ րոպեին 11 մետրանոց հարվածով խփեցին սերբերը, իսկ Պորտուգալիան Դանիլոյի շնորհիվ հաշիվը հավասարեցրեց 42-րդ րոպեին:

B խմբի մյուս խաղում Ուկրաինան մի կերպ հաղթեց Լյուքսեմբուրգին: Ընդ որում առաջինը գոլ խփեց Լյուքսեմբուրգը, իսկ Ուկրաինան հաղթանակ տարավ խաղի ամենավերջում լյուքսեմբուրգցի Ռոդրիգեսի ինքնագոլի շնորհիվ:

Այս տուրում խաղից ազատ էր Լիտվայի հավաքականը, իսկ այս խմբի մրցաշարային աղյուսակը ամառային խաղերից առաջ 4 միավորով գլխավորեց Ուկրաինան: Երեք միավորով երկրորդ տեղում է Լյուքսեմբուրգը:

A խմբում, որտեղ խաղից ազատ էր Չեխիան, Անգլիան մրցակցի դաշտում 5:1 հաշվով հաղթեց Չեռնոգորիային: Հիշեցնենք, որ առաջին խաղում անգլիացիները 5:0 հաշվով հաղթել էին չեխերին: Կոսովոն 1:1 խաղաց Բուլղարիայի հետ:

Աղյուսակը վեց միավորով գլխավորում է Անգլիան, իսկ երկրորդ տեղում ընթացող Բուլղարիան ունի երկու միավոր:

H խմբի բոլոր երեք խաղերն ավարտվեցին խոշոր հաշիվներով: Թուրքիան 4:0 հաշվով հաղթեց Մոլդովային, Ալբանիան մրցակցի դաշտում 3:0 հաղթեց Անդորրային, իսկ Ֆրանսիան 4:0 հաշվով հաղթեց Իսլանդիային:

Ֆրանսիան եւ Թուրքիան վեցական միավորով գլխավորում են աղյուսակը:

Top-News.am