Մոսկվայում ամերիկացի հայտնի ֆինանսիստ է ձերբակալվել

Baring Vostok հայտնի ներդրումային ընկերության հիմնադիր, ԱՄՆ քաղաքացի Մայքլ Քելվին և նրա գործընկերը հետապնդվում են խարդախության մեղադրանքով: Ընկերությունը ԱՊՀ երկրների տարածքում ներդրել է 2.5 մլրդ դոլար 80 նախագծերի համար:

Նա փետրվարի 15-ին Մոսկվայում ձերբակալվել է: Տղամարդն ուղարկվել է Բասմաննի դատարան, որն էլ քննության արդյունքում 3 օրով երկարաձգել է հայտնի ֆինանսիստի ձերբակալության ժամկետը: Նրա նկատմամբ խափանման միջոցի վերաբերյալ որոշումը կկայացվի փետրվարի 16-ին:

Ինչպես Մոսկվայի քաղաքային դատարանի հրապարակած հաղորդագրությունից է պարզ դառնում, Քելվիի նկատմամբ մեղադրանք է առաջադրվել հանցավոր խմբի կողմից կազմակերպված առանձնապես խոշոր չափերի խարդախության հոդվածով: Բացի դրանից, ձերբակալվել է ընկերության ևս 5 աշխատակից:

Интерфакс-ի տվյալներով` նրանք յուրացրել են ավելի քան 2.5 մլրդ ռուբլի:

Մայքլ Քելվինը ծնվել է 1967թ. ամերիկյան Վիսկոնսին նահանգում: Մինչև 1994թ. ապրել է Լոնդոնում ու Նյու Յորքում:

1994-ին հիմնել է Baring Vostok Capital Partners ընկերությունը, որը մասնագիտացած է Ռուսաստանում և ԱՊՀ-ում ներդրումների վրա:

Ընկերության կայքէջում հրապարակված տեղեկատվության համաձայն՝ իր գործունեության 25 տարիների ընթացքում այն ներդրել է 2.8 մլրդ դոլար Ռուսաստանում, Ղազախստանում և Ուկրաինայում իրականացված շուրջ 80 նախագծերում: