Ադրբեջանցի բանկիրի՝ 1,5 մլն դոլարանոց ադամանդյա մատանին առգրավվել է Լոնդոնում՝ «կեղտոտ փողերի» գործով հետաքննության շրջանակում

Մեծ Բրիտանիայի ոստիկանությունն առգրավել է Cartier բրենդի ադամանդյա մատանի, որն արժե 1,5 մլն դոլար ու պատկանում է ներկայում Բաքվում անազատության մեջ գտնվող ադրբեջանցի բանկիր Ջահանգիր Հաջիևին:

Ինչպես նշում է The Guardian-ը, զարդի առգրավումը տեղի է ունեցել «կեղտոտ փողերի» գործով հետաքննության շրջանակում՝ շրջանային դատավորի թույլտվությամբ: Այժմ իրավապահները պետք է պարզեն՝ ինչ միջոցներով է Հաջիևը ձեռք բերել 8,9 կարատանոց մատանին:

Նշվում է, որ բանկիրը մատանին գնել է 2011թ.՝ Լոնդոնում: Այն գնվել է կալանավորի կնոջ՝ Զամիրա Հաջիևայի համար: Ի դեպ, վերջինս անհայտ ծագման մեծ հարստության պատճառով այժմ գտնվում է Մեծ Բրիտանիայի Հանցագործությունների ազգային գործակալության ուշադրության կենտրոնում: Հաջիևան հրաժարվել է բացատրել՝ որտեղից իրեն այդքան մեծ կարողություն: Եվ եթե նա շարունակի նույն կերպ իրեն պահել, դատարանը կարող է առգրավել նրա անշարժ գույքը, այդ թվում՝ մոտ 20 մլն դոլար արժողությամբ հինգ սենյականոց շքեղ բնակարանը Լոնդոնում, 15 մլն դոլարանոց գոլֆ ակումբն Ասկոտում:

Նախորդ տարի Լոնդոնի Բարձր դատարանը բացահայտել էր, որ Հաջիևան տասը տարվա ընթացքում ավելի քան 20 մլն դոլար է ծախսել Harrods շքեղ հանրախանութում: Բացի այդ, պարզվել է, որ կինն ունի 42 մլն դոլար արժողությամբ Gulfstream G550 անձնական օդանավ, աշխարհի ամենաթանկ գինիներով մառանը:

Նախորդ տարվա նոյեմբերին իրավապահները Հաջիևայից առգրավել են մոտ 1 մլն դոլարի թանկարժեք զարդ՝ դրանց համար վճարված գումարների ծագման աղբյուրը պարզելու նպատակով:

Աղբյուրը հավելում է, որ Ադրբեջանի իշխանությունները հետախուզում են հայտարարել Հաջիևայի նկատմամբ՝ նախկինում նրա ամուսնուն պատկանող բանկի իրականացրած խարդախությունների գործով հետաքննության շրջանակում:

Ադրբեջանական կողմի պնդմամբ՝ Հաջիևը կնոջ միջոցով գումարները երկրից դուրս է հանել: Սակայն Հաջիև ընտանիքը հերքում է բոլոր մեղադրանքները: