The New York Times․ Գերտ Վիլդերսի անհաջողության պատճառը մտահոգված հոլանդացիների ձայների տարաբաշխումն էր

Ըստ էքսիտ- փոլերի նախնական տվյալների՝ ծայրահեղ աջ քաղաքական գործիչ Գերտ Վիլդերսի ակնկալիքները չեն արդարացել՝ նա ստացել է տեղեր խորհրդարանում, սակայն չի կարողացել համոզել զգալի քանակության ընտրողների, որ սատարեն իր արմատական դիրքորոշումները՝ մուսուլման ներգաղթյալների մուտքը ԵՄ արգելելու ու ԵՄ-ից Նիդեռլանդների դուրս գալու մասին, գրում է The New York Times-ը։

Այս արդյունքները անմիջապես ողջունել են եվրոպամետ քաղաքական գործիչները, որոնք հույս ունեն, որ իրենց կհաջողվի կանգնեցնել ուժ հավաքող պոպուլիստական, հակաեվրոպական ու հակամուսուլմանական ուժերը, որոնց մարմնավորումն է դարձել Վիլդերսը, ասվում է հոդվածում։ «Ընտրողները, որոնց մասնակցությունը ընտրություններին ռեկորդային էր, այդուհանդերձ նախապատվություն են տվել աջ ու աջ կենտրոնամետ կուսակցություններին, այդ թվում գործող վարչապետ Մարկ Ռյուտեի կուսակցությանը»,- նշում է հոդվածագիրը։

Նիդեռլանդական ընտրությունները կարեւոր ցուցիչ են համարվում առաջիկա ամիսներին Ֆրանսիայում, Գերմանիայում ու գուցե նաեւ Իտալիայում կայանալիք ընտրությունների արդյունքների կանխատեսման համար։

«Բրեքսիթից ու ամերիկյան ընտրություններից հետո նրդեռլանդցիները ասացին «ոչ» սխալ պոպուլիզմին»,- ասել է Նիդեռլանդների վարչապետ Մարկ Ռյուտեն։

«Պոպուլիստների կոչերը այստեղ՝ Նիդեռլանդներում մերժվեցին ։ Մեր ընտրություններին հետեւում էր ամբողջ Եվրոպան, ամբողջ աշխարհը, որպեսզի հասկանա, արդյոք Եվրոպան տեղի կտա պոպուլիստների կոչերին»,- ասել է Ալեքսանդր Պեխտոլդը, «Դեմոկրատներ-66» ձախակողմյա կուսակցության առաջնորդը, որը նույնպես լավ արդյունքներ է ստացել ընտրություններում։

Քաղաքագետ Մարկ Բովենսը նշում է, որ Վիլդերսի կուսակցությունն ու մյուս աջ կուսակցությունները այդպես էլ չկարողացան հաղթահարել իրենց ավանդական շեմը։ նրա կարծիքով պատճառներից մեկն էլ այն է, որ որոշ ավանդական կուսակցություններ շարժվել էին դեպի ավելի ազգայնական ուղղություն՝ Վիլդերսից փոխառելով նրա հռետորաբանության մի մասը ու դրանով իսկ թուլացնելով նրա առագաստին փչող քամու ուժգնությունը։ Նույն միտումն է նկատվում նաեւ նախընտրական Գերմանիայում։

Վիլդերսը, որին կարծես դուր էր գալիս, որ իրեն անվանում են «հոլանդական Դոնալդ Թրամփ», այնքան արմատական հայացքներ ունի, որ ոմանց դա պարզապես վախեցրել է։ Նա կոչ էր անում արգելել Ղուրանը, համեմատելով այն ՀԻտլերի «Մայն կամպֆ»-ի հետ, փակել մզկիթները, իսլամական մշակութային կենտրոններն ու դպրոցները։

Բայցեւայնպես այս ընտրությունների արդյունքները կարող են որոշակի խնդիրներ ստեղծել Նիդեռլանդներում։ Կարող է ձեւավորվել երկրի պատմության մեջ ամենամասնատված կառավարությունը։ Որոշ քաղաքագետներ համարում են ,որ կառավարության ձեւավորման համար շաբաթներ կամ ամիսներ կպահանջվեն, իսկ իշխող կոալիցիան էլ փխրուն կլինի, ամփոփում է հոդվածագիրը։

news.am