Ուկրաինայի ամենահարուստ մարդկանց ցանկում ընդգրկված հայազգի գործարարն օգնության խնդրանքով դիմել է Պյոտր Պորոշենկոյին (տեսանյութ)

Ուկրաինայում բնակվող հայազգի գործարար Արթուր Մխիթարյանը, որը շինարարական բիզնես է վարում, տեսանյութ է հրապարակել՝ դիմելով Ուկրաինայի նախագահ Պյոտր Պորոշենկոյին:

Ինչպես տեղեկացնում է Rusarminfo-ն, գործարարն երկրի նախագահին կոչ է արել կանխել Ուկրաինայի Անվտանգության ծառայության գործողություններն իր ղեկավարած Taryan Group-ի և այլ ընկերությունների նկատմամբ:

Իր տեսաուղերձում Մխիթարյանն ընդգծել է, որ շինարարության համար նոր կանոններով անհրաժեշտ է մշակույթի նախարարության հավանությունը, որն էլ թույլտվություն է տալիս ոչ բոլոր ընկերություններին: Նման թույլտվություն ստանալուց հետո էլ Ուկրաինայի անվտանգության ծառայությունը քրեական գործ է հարուցել՝ դրա բացակայության ձևակերպմամբ:

Ձեռներեցը նշել է, որ ուժային կառույցները և մշակույթի նախարարությունն արհեստական արգելքներ են ստեղծում շինարարության համար: Նրա խոսքով՝ պաշտոնատար անձինք չարաշահում են իրենց լիազորությունները՝ շանտաժի ենթարկելով աճող բիզնեսը ներկայացնող ընկերություններին և այդպիսով վնաս հասցնելով Ուկրաինայի բիզնես-կլիմային:

Հայր և որդի Նվեր և Արթուր Մխիթարյանների Taryan group ընկերությունը զբաղվում է շինարարության ոլորտում ինովացիոն նախագծերի իրականացմամբ: Նրանց կարողությունը գնահատվում է 114 մլն դոլար:

Հիշեցնենք, որ ավելի վաղ հայտնի էր դարձել, որ Մխիթարյանները 44-րդ տեղն են զբաղեցրել Ուկրաինայի 100 ամենահարուստ մարդկանց ցանկում: