Եվրոպացիները սկսել են ավելի շատ գումար ծախսել պաշտպանության վրա

ՆԱՏՕ-ի գլխավոր քարտուղար Ենս Սթոլթենբերգը Բրյուսելում ներկայացրել է դաշինքի տարեկան հաշվետվությունը, որից բխում է, որ 2016-ին ՆԱՏՕ-ի եվրոպական պետությունները պաշտպանության վրա ծախսել են ՀՆԱ-ի 1․47 տոկոսը։ Ընդ որում անցած տարի այդ ցուցանիշը գտնվում էր 1․43 մակարդակի վրա, գրում է Der Spiegel–ը։

ՆԱՏՕ-ի գործընկեր -երկրները, պարբերականի խոսքով, դեռ 2014-ին Ուելսում տեղի ունեցած գագաթնաժողովի ժամանակ պայմանավորվել էին 2015-ից սկսած ռազմական բյուջեի նվազագույն սահմանը ՀՆԱ 2 տոկոսը դարձնել։ Բայց ներկա տեմպերով , հեղինակի խոսքով․ «եվրոպացիներից ու կանադացիներից 13 տարի կպահանջվի այդ միջինացված ցուցանիշն ապահովելու համար»։

Ամեն դեպքում սա ընդամենը միջինացված ցուցանիշ է։ Իրականում Եվրոպայի ներքին տարբերությունները շատ մեծ են՝ օրինակ ԱՄՆ-ից բացի պաշտպանության համար 2 տոկոսից շատ ծախսում են միայն Մեծ Բրիտանիան, Հունաստանը, Էստոնիան ու Լեհաստանը։ Գերմանիայում, հակառակը, պաշտպանությանը հատկացվում է ՀՆԱ-ի ընդամենը 1․2 տոկոսը։

Ավելին, Գերմանիայոմ մեծ կասկածներ կան այն հարցում՝ արժե արդյո՞ք երկրում մինչեւ 2 տոկոս բարձրացնել այդ ծախսերը։ Մասնավորապես մեծ կասկածներ կան կանցլեր Անգելա Մերկելի կուսակցության ՝ ՔԴՄ-ի ներսում, էլ չասենք ընդդիմության մասին։

Շատ փորձագետներ նույնպես կարծում են ,որ պաշտպանական բյուջեների հասարակ կրկնապատկումը ոչ մի արդյունք չի տա, հավելում է Der Spiegel–ը։

 NEWS.am