Ֆրանսուա Ֆիյոնի ընկերը նրա համար 13 000 եվրոյի կոստյում է գնել

Ֆրանսիական մամուլը հանգիստ չի թողնում «Հանրապետականներ» կուսակցությունից առաջադրված նախագահի թեկնածու Ֆրանսուա Ֆիյոնին, որին մարտի 15-ին պատրաստվում են մեղադրանք առաջադրել բյուջեի միջոցների մսխման գործով։ Այսօր Le Journal du dimanche պարբերականը սկսել է քննարկել Ֆիյոնի զգեստապահարանը։ Պարբերականը պարզել է, թե որտեղից է հագուստ գնում նախագահի թեկնածուն, որի կասկածում են կնոջը՝ Պենելոպային ու երեխաներին խորհրդարանում ֆիկտիվ աշխատանքի դասավորելու մեջ։

Առնվազն 2012-ից սկսած Ֆրանսուա Ֆիյոնը Arnys հեղինակավոր նորաձեւության տան մշտական հաճախորդն է։ Այդ տարիներին նա 48 500 եվրո է ծախսել էլիտար հագուստի վրա։ Ընդ որում 35 500 –ը կանխիկ է վճարել։

Հենց միայն փետրվարի 9-10-ը , «Պենելոպագեյթսից» ընդամենը երկու շաբաթ անց, Ֆիյոնը նորաձեւության տնից երկու կոստյում է պատվիրել՝ յուրաքանչյուրը 6500 ական եվրո։ 13 000 եվրոն վճարվել է իտալական Monte Paschi բանկի կտրոնով։ Իսկ կտրոնի վրա ստորագրած մարդը JDD թերթին խոստովանել է, որ ինքն է վճարել Ֆիյոնի կոստյումների համար։ «Ես դրա համար նույնիսկ շնորհակալության չեմ արժանացել»,- նկատել է անանուն բարերարը, որը ներկայացել է որպես Ֆիյոնի «առատաձեռն ընկեր»։

ՖԻյոնի շրջապատում հաստատել են, որ «ընկերներից մեկը նրան փետրվարին կոստյումներ է նվիրել», բայց ոչ մի դատապարտելի բան դրանում չեն տեսել ու վրդովվել «թե որքան հեռու պետք է գնա այդ միտումնավոր ներխուժումը Ֆիյոնի անձնական կյանք»

Վերջին 4 տարիներին Ֆիյոնի համար Arnys-ում 48 500 եվրոյի թանկարժեք հագուստ են կարել։

Փետրվարին նվեր ստացած կոստյումներն էլ Ֆրանսուա Ֆիյոնը դեռ անցած սեպտեմբերին էր պատվիրել, երբ աջերի ու կենտրոնամետների փրայմերիզների աութսայդեր էր։

news.am