«ԼՂ հիմնախնդրի լուծման համար Թուրքիայի եւ ՌԴ-ի համագործակցությունը տապալվեց այլ ուժերի միջամտությունից». Էրդողանի խոսնակ

Թուրքիայի նախագահ Ռեջեփ Թայիփ Էրդողանի խոսնակ Իբրահիմ Քալընն Անկարայի «Յըլդըրըմ Բեյազիթ» համալսարանում տեղի ունեցած «Թուրքիա-Ռուսաստան հարաբերություններ. Ձևավորել ապագան» խորագրով գիտաժողովի ժամանակ անդրադարձել է Արցախի հիմնախնդրին ու դրա կարգավորման հարցում Ռուսաստանի ստանձնած դերին:

Ինչպես գրում է թուրքական «Աքշամ» պարբերականը, Քալընը կրկին խոսել է «ադրբեջանական հողերի շրջափակումից» և կոչ արել Հայաստանին հանձնել այդ տարածքներն Ադրբեջանին՝ միևնույն ժամանակ պնդելով, որ Թուրքիան Հայաստանի հանդեպ նախապաշարմունքներ չունի:

«Այս հարցում մեր դիրքորոշումը շատ հստակ է: Մենք մի քանի փորձ ենք կատարել Կովկասում կրկին խաղաղության վերականգնման ու Հայաստանի կողմից շրջափակմանը վերջ դնելու համար: Այս հարցում մեր ռուս գործընկերների հետ սերտ համագործակցություն էլ եղավ, սակայն կրկին այլ ուժեր միջամտեցին ու գործընթացը տապալվեց: Սակայն երբ դա տեղի ունենա՝ դրանից ամենաշատ օգուտը հենց Հայաստանը կքաղի: Մենք Հայաստանի դեմ որևէ նախապաշարմունք չունենք»,-ասել է Քալընը:

Էրդողանի խոսնակը նաև շեշտել է, որ իրենց կարծիքով՝ 1992 թվականին ստեղծված ԵԱՀԿ Մինսկի խումբը մինչ օրս որևէ օգուտ չի տվել հակամարտության լուծման գործընթացին:

Այս թեմայով Թուրքիա–Հունաստան սահմանին զինված բախում է տեղի ունեցել Թուրքիայի ընդդիմադիր կուսակցապետի նկատմամբ հետաքննություն է սկսվել Թուրքիայում 5․8 մագնիտուդ ուժգնությամբ երկրաշարժ է տեղի ունեցել․ կա 1 զnh և 69 տուժած Զբոսաշրջիկները չեղարկում են դեպի Թուրքիա տուրերը՝ հնարավոր երկրաշարժերի պատճառով Անկարան ուշադիր հետևում է Ուկրաինայի բանակցություններին