ԵՄ-ը որոշել է արգելափակել Թուրքիայի եվրաինտեգրմանն ուղղված մի շարք նախագծերի վճարումները

Եվրամիությունը որոշում է ընդունել եվրոպական տարածքին Թուրքիայի եվրաինտեգրմանն ուղղված մի շարք նախագծերի վճարումներն արգելափակելու մասին: «Մենք իրավաբանորեն պարտավոր ենք ֆինանսական աջակցությունը համադրել այն առաջընթացի հետ, որին երկիրը հասնում է»,- dpa գործակալության հետ հարցազրույցում հայտարարել է ԵՄ-ի ընդլայնման եւ հարեւանության քաղաքականության հարցերով եվրահանձնակատար Յոհաննես Հանը:

«Բացասական միտումները սկսվել են դեռեւս մինչեւ հուլիսյան խռովությունը, որոնք հակասում են ոչ միայն ԵՄ-ի ստանդարտներին, այլեւ միջազգային իրավունքին»,- ասել է Հանը: 2014-ից մինչեւ 2020 թվականը ծրագրված ԵՄ-ի կողմից Թուրքիային ֆինանսական օգնությունը կազմում է 4,45 մլդ եվրո: Ներկայումս Բրյուսելը Անկարային է փոխանցել 167 մլն եվրո, փոխանցում է DW-ն:

Եվրոպական ֆինանսական օգնությամբ Թուրքիային պետք է օգնեին հասնել հետագա եվրաինտեգրման համար անհրաժեշտ ստանդարտներին: Վճարումները կապված են կոնկրետ նախագծերի հետ, որոնցից ամենախոշորը «ԵՄ-ին անդամակցության նախապատրաստման բարեփոխումներն են»՝ այս նպատակով ԵՄ-ը մտադիր էր տրամադրել 1,58 մլրդ եվրո:

Մինչդեռ Թուրքիան ոչ թե Եվրոպայի ուղղությամբ է ընթանում, այլ հակառակ ուղղությամբ, նշել է Յոհաննես Հանը, ինչը, նրա խոսքով, չի կարող հետեւանքներ չունենալ: Փողերը պետք է բացեն Եվրոպայի դռները, այլ ոչ թե ծառայեն հակառակ նպատակների, հայտարարել է նաեւ թվային տնտեսության եւ հասարակության եվրահանձնակատար Գյունտեր Էթինգերը:

Առայժմ լիովին հստակ չէ, թե Բրյուսելը հատկապես ինչ վճարումներ եւ ինչ ժամկետով է սառեցնում: Հնարավոր է՝ որոշումը կընդունվի ԵՄ-ի ԱԳ նախարարների առաջիկա հանդիպման ժամանակ: Միեւնույն ժամանակ, ԵՄ-ը Անկարայի հետ երկխոսությունը չի դադարեցնում եւ ցանկանում է Թուրքիային օգնել իրավական պետություն կառուցելու հարցում: Եվրահանձնակատար Հանը, սակայն, նշել է, որ «ԵՄ-ին Թուրքիայի անդամակցության բանակցությունները, փաստորեն, կասեցվել են»:

news.am