«Շանթը» վարակվեց «մանկական հիվանդությամբ»

«Շանթ» հեռուստաընկերությունը Ucom-ին հայտնել է կամ Ucom-ից պահանջել է չհեռարձակել իր հաղորդումները: Այլ կերպ ասած, Ucom-ի բաժանորդներն այլեւս «Շանթ» չեն կարող դիտել: Ավելի ճիշտ, կարող են դիտել, բայց առանց Ucom: 

Շեշտենք, որ խոսքը վերաբերում է «Շանթի» համապետական ալիքին, եւ ոչ թե «Շանթ պրեմիումի» ալիքներին:

Կարճ ասած, «Շանթին» «տարել է աստղային հիվանդությունը», այն էլ՝ չհիմնավորված կամ վարակվել է հեռուստաալիքների անցումային շրջանին բնորոշ «մանկական հիվանդությամբ»:

Ամեն ինչ շատ պարզ է: «Շանթում» եւ «Ռոստելեկոմում» հանկարծ եկել են այն եզրահանգման, որ միայն «Շանթի» համապետական ալիքը դիտելու համար ՀՀ քաղաքացիները կհրաժարվեն Ucom-ից եւ կբաժանորդագրվեն «Ռոստելեկոմին»: Իրոք, ցնցող տրամաբանություն:

Շատ լավ կլիներ, եթե «Շանթում» բացատրեին, թե որ հաղորդման կամ սերիալի համար ՀՀ քաղաքացին պետք է նման կտրուկ որոշում կայացնի: Հնդկական սերիալ նայողները ոչ Ucom են բաժանորդագրվում, ոչ էլ «Ռոստելեկոմ», բայցի այդ, լինենք մինչեւ վերջ անկեղծ, «Շանթը» չունի որեւէ հաղորդում, որի համար մարդը կփոխի իր հեռուստաօպերատորին:

Մի գաղտնիք եւս հայտնենք «Շանթին» եւ «Ռոստելեկոմին»: Նրանք, ովքեր «Շանթը» դիտելու անհագուրդ ցանկություն կունենան, մի սարք կգնեն՝ թվային հեռարձակումն ընդունող սարք, եւ կդիտեն «Շանթը»: Այնպես որ, այս հարայ-հրոցը գրոշի արժեք չի ունենալու:

Աննա Բաղդասարյան

Top-News.am