Հարկային տեսչությունը հարձակվել է ETTO KIDS մանկական զարգացման և ժամանցի կենտրոնի վրա

Բաց նամակ ՀՀ փոխվարչապետի պաշտոնակատար Տիգրան Ավինյանին, ՊԵԿ նախագահ Դավիթ Անանյանին:

Հարկային տեսչությունը հարձակվել է ETTO KIDS մանկական զարգացման և ժամանցի կենտրոնի վրա:

Պարոն Ավինյան, Պարոն Անանյան,
Երեկ հարկային տեսչությունը վերջին երկու տարվա ընթացքում իրականացրեց թվով 3-րդ ստուգումը ETTO KIDS մանկական զարգացման և ժամանցի կենտրոնում:
Անհասկանալի է, թե ինչ են ուզում մեզանից, այդ ինչ ռիսկեր են տեսնում մեր վարած գործունեության մեջ, որ երկու տարվա ընթացքում բացում են մեզ վրա երրորդ ստուգումը: Այն ժամանակ երբ ազգովի նստած, շունչներս պահած սպասում ենք, թե երբ պետք է ՊԵԿ աշխատակիցները հերոսաբար բացահայտեն մեր կոռումպացված պաշտոնյաների և նրանց ընկերությունների կողմից երկրից գողացված միլիարդները, այդ ժամանակ հարկային տեսուչները զբաղված են մանկական կենտրոններ ստուգելով…

ETTO KIDS-ը զարգացման կենտրոն է, որտեղ 3-14 տարեկան երեխաները և պատանիները տարատեսակ նախագծերի, խաղերի միջոցով ձեռք են բերում գիտելիքներ, մաթեմատիկայի, ֆիզիկայի, ինժեներիայի, շինարարության, ծրագրավորման և ռոբոտաշինության բնագավառներում: Կենտրոնը բացվել է 2016թ-ին և կարճ ժամանակահատվածում դարձել է երեխաների սիրված վայրը: Իրականում հասկանալի է, որ բավականին բարդ է Շենգավիթ համայնքում աշխատացնել նման կենտրոն և գոյատևել երկու տարի, սակայն մենք անում ենք հնարավոր և անհնարին ամեն ինչ:

Այս անգամ հարկային տեսուչները մուտք գործելով զարգացման կենտրոն ներկայացել են որպես ծնող, ով ցանկանում է իր երեխայի ծննդյան տարեդարձը կազմակերպել մեր կենտրոնում, 25 երեխայի/մեծահասակների համար կազմել են ծառայությունների ցանկ 103.000 ՀՀ դրամ արժողությամբ` մենյու, զարգացնող խաղեր, ֆիքսել են միջոցառման օր`22.10.2018թ, ժամ` 18:00, թողել են 20.000 ՀՀ դրամ կանխավճար, ստացել են կանխավճարի դիմաց ՀԴՄ կտրոնը և հեռացել են: Մի քանի օր անց, մեկ այլ տեսուչ, կրկին ներկայանալով որպես ծնող մուտք է գործել զարգացման կենտրոն, կազմել է նմանատիպ պատվեր, նույնպես վճարել է 20.000 ՀՀ դրամ, ստացել է վճարված կանխավճարի ՀԴՄ կտրոնը և հեռացել:

22.10.2018թ. այն օրը, երբ պետք է լիներ “հարկային տեսուչի երեխայի ծննդյան տարեդարձը” (առաջին կանխավճարով նախատեսված միջոցառումը) հարկային տեսուչները ժամը 17:45 սահմաններում եկել են զարգացման կենտրոն և բացահայտել են, որ իրենք ոչ թե ծնողներ են, այլ մեր կենտրոնում իրականացրել են ստուգում, ինչի արդյունքում, որևէ խախտում չեն հայտնաբերել և պահանջել են հետ վերադարձնել վճարված 2x20.000 ՀՀ դրամ կանխավճարները: Մենք զարմացանք և տեղեկացրեցինք նրանց, որ այսօրվա 25 հոգուց բաղկացած միջոցառման նախապատրաստական աշխատանքները (զարգացնող խաղեր, ուտեստներ, խմիչքներ, զարդարանք, փուչիկներ, խաղավար…) ամբողջությամբ պատրաստ է և մենք այս պահին սպասում ենք միջոցառման հյուրերին: Տեսուչները նորից տեղեկացրեցին, որ որևէ միջոցառում չի լինելու, որ դա եղել է միջոցառման կազմակերպման իմիտացիա և պահանջեցին մեզանից վերադարձնել 2x20.000 ՀՀ դրամ կանխավճարները: 2-րդ 20.000 ՀՀ դրամը իհարկե մենք վերադարձրեցինք քանի որ փաստացի որևէ նախապատրաստական աշխատանք այդ միջոցառման համար դեռ չէինք հասցրել կատարել, իսկ առաջին վճարված 20.000 ՀՀ դրամը հրաժարվեցինք վերադարձնել + պահանջեցինք հատուցել մեզ պատճառված վնասը 103.000 ՀՀ դրամի չափով, սակայն նրանք լսել անգամ այդ մասին չուզեցան:

Ինչ է ստացվում, ստացվում է, որ հարկային տեսչության սխալ կազմակերպված աշխատանքի արդյունքում մեր ընկերությանը պատճառվել է 103.000 ՀՀ դրամի վնաս: Եթե այն մասին, որ մեզ մոտ իրականացվել է ստուգում նրանք տեղեկացնեին մեզ մեկ օր առաջ, կամ միջոցառման նույն օրը առավոտյան, ապա մենք կհասցնեինք չկատարել նախապատրաստական ծախսերը: Ինչու պետք է հարկային տեսչության անգրագետ կազմակերպված աշխատանքի արդյունքում մենք վնաս կրենք, այսպես ենք մենք նպաստում մանր և միջին բիզնեսի զարգացմանը:

Այսօր մենք հանդիպում ունեցանք Շենգավիթի ՀՏ պետի տեղակալի հետ, ում ներկայացրեցինք ստեղծված իրավիճակը և խնդրեցինք, որպեսզի հարկային տեսչությունը հարգի մեզ, մեր աշխատանքը և լուծում տա ստեղծված իրավիճակին: Սակայն վերջինս շատ մարտական և սկզբունքային մոտեցավ այս հարցին և հրաժարվեց որևէ լուծում տալ, փոխարենը նշեց, որ ինքը իր գործը շատ լավ գիտի, հարկային տեսչությունը իրականացրել է ստուգում, և որևէ մեկը, այդ թվում ինքը չի պատրաստվում իր գրպանից գումար տալ և հորդորեց, որ դիմենք ում ուզում ենք:

Մենք լսեցինք Շանգավիթի հարկային տեսչության պետի տեղակալի հորդորը և դիմում ենք Ձեզ, որպեսզի այս իրավիճակին լուծում տաք:

Հարգանքով
ETTO KIDS ընկերություն