Կրկին գնում ենք արտաքին պարտքի ավելացման ճանապարհով

Իշխանության գալուց անմիջապես հետո վարչապետ Նիկոլ Փաշինյանը հայտարարեց պետական պարտքը նվազեցնելու քաղաքականության մասին։ Ավելին, հրապարակվեցին նաև կոնկրետ թվեր, թե որքանով է նվազել պետական պարտքը իշխանափոխությունից հետո։

Մասնավորապես, հուլիսի 31-ի դրությամբ ՀՀ պետական պարտքը կազմել էր 6 մլրդ 759 մլն դոլար, մինչդեռ տարեսկզբին այն 6 մլրդ 774.6 մլն դոլար էր եղել:

Իսկ ահա հիմա՝ այդ հայտարարություններից երեք ամիս անց, Ֆինանսների նախարար Ատոմ Ջանջուղազյանը հայտարարեց, որ գնում են նոր պարտք վերցնելու ճանապարհով:

Ուշագրավ է, որ ինքը՝ Նիկոլ Փաշինյանը դեռ հուլիսին հայտարարում էր, թե պետական պարտքը արդեն հատում է օրենքով նախատեսված վերին սանդղակը, և ինքը որպես լուծում տեսնում է կոռուպցիայի և ստվերի դեմ պայքարը։

«Գանձենք պետությանը, ժողովրդին հասանելիք գումարները, և այդպիսով նաև ավելացնենք պետական եկամուտները։ Պետական եկամուտները ավելացնելով՝ մենք բնականաբար այդ պետական եկամուտները պետք է ծախսենք պետական նպատակների համար, որի մեջ է նաև թոշակները, աշխատավարձերը, անվտանգությունը և այլն…»,-վստահեցնում էր Փաշինյանը։ 

Անկեղծ լինենք, Նիկոլ Փաշինյանը քաղաքական գործիչ է և տնտեսագետ պարտավոր չէ լինել, բայց նրան շրջապատող տնտեսագետները նախ և առաջ պարտավորեն ներկայացնել իրականությունը, բացատրել, որ կոռուպցիայի դեմ պայքարով, որքան էլ այն հաջող ընթանա, պետական պարտք չես փակի:  

Իսկ հիմա պարզվում է, պետական պարտքը զրոյացնող կառավարությունը 80 աստիճանով փոխել իր քաղաքականությունը։

Ի՞նչ է տեղի ունեցել այն «գանձված» գումարների հետ, որոնց մասին խոսում էր վարչապետը դեռ հուլիսին, իսկ գուցե առհասարակ որևէ գումար չի՞ հաջողվել գանձել։ Այլապես ինչպե՞ս պարզաբանել այն փաստը, որ նոր կառավարությունը վերադարձել է նախկին իշխանությունների որդեգրած քաղաքականությանը և գնում է՝ պետական պարտքի մեծացման ճանապարհով։

Այս դեպքում նույնիսկ էական էլ չէ, թե ինչ հիմնավորմամբ է տեղի ունենում այդ գոթրծընթացը։ Էականն այն իրողությունն է, որ ՀՀ քաղաքացիներիս ուսերին պարտքի բեռը տարեցտարի ծանրանում է։

Ի դեպ, եթե մի քանի ամիս առաջ խոստացված «գանձումները» չեն իրականացել և էլի մնացել ենք արտաքին պարտքի հույսով, ապա միանշանակ ենթադրելի է, որ չե՛ն իրականացվելու նաև Նիկոլ Փաշինյանիի մյուս խոստումները՝ թոշակների, աշխատավարձերի, անվտանգության և այլ մասերով։ Իսկ ավելի ճիշտ, ոչ թե ենթադրելի է, այլ այդպես էլ կա: Արդեն պաշտոնական հայտարարություն է եղել այդ մասին:

Գրիգոր Հայրապետյան

Top-News.am