Թրամփն ընդունում է, որ իր թիմը Քլինթոնին վարկաբեկող նյութեր ստանալու համար էր հանդիպել ռուսների հետ

ԱՄՆ նախագահ Դոնալդ Թրամփն ընդունել է, որ 2016 թվականին Նյու Յորքում Trump Tower երկնաքերի սրահներից մեկում իսկապես տեղի է ունեցել իր ներկայացուցիչների և Կրեմլի հետ կապեր ունեցող փաստաբանի հանդիպումը, որի նպատակն էր «տեղեկություններ ստանալ մրցակից թեկնածուի մասին»:

Թրամփի պնդմամբ՝ «այդ հանդիպումը միանգամայն օրինական էր, և նման հանդիպումներ քաղաքական ասպարեզում միշտ էլ տեղի են ունենում»:

Ռուսաստանցի փաստաբան Նատալյա Վեսելնիցկայայի հետ հանդիպմանը ներկա են եղել նախագահի որդին՝ Դոնալդ Թրամփ կրտսերը, փեսան՝ Ջարեդ Քուշները, նախընտրական արշավի ղեկավար Փոլ Մանաֆորթը և Թրամփի թիմի այլ ներկայացուցիչներ:

Հանդիպումը տեղի է ունեցել, երբ ռուսները Թրամփի որդուն փոխանցել են, որ ունեն Դեմոկրատական կուսակցության թեկնածու Հիլարի Քլինթոնին վարկաբեկող, մասնավորապես՝ նրա կողմից էլեկտրոնային նամակագրության գաղտնիությունը չապահովելու մասին վկայող նյութեր:

Նատալյա Վեսելնիցկայան հերքել է Կրեմլի հանձնարարությամբ հանդիպմանը մասնակցելու իրողությունը՝ Կոնգրեսին փոխանցելով, թե գործել է «պետական գերատեսչություններից անկախ»:

Թվիթերում Թրամփի տեղադրած այդ գրառումն այսօրվա դրությամբ նրա առաջին հստակ խոստովանությունն է այն մասին, որ ռուսաստանցի փաստաբանի հետ իր որդու և իր թիմի այլ ներկայացուցիչների հանդիպման նպատակը Քլինթոնին վարկաբեկող նյութեր ստանալն էր:

Այս թեմայով The Wall Street Journal. Պենտագոնը տասնամյակներ շարունակ խրախուսել է ամերիկացիների հավատը ՉԹՕ-ների նկատմամբ Կոբախիձեն տարակուսանք է հայտնել Թրամփին Վրաստանի հետ հարաբերությունները վերականգնելու հարցում ԱՄՆ լռության կապակցությամբ Պետքարտուղարությունը կկրճատի ավելի քան 130 գերատեսչություն և ավելի քան 700 հաստիք Լրատվամիջոցները նշել են Ուկրաինայի նպատակը ԱՄՆ-ի հետ բանակցություններում Թրամփի վարչակազմը ծրագրում է ամեն օր ռազմական օդային ուժերով արտաքսել միգրանտներին. Թոմ Հոման