Ցուկերբերգը դուրս է մնացել աշխարհի ամենահարուստ մարդկանց եռյակից

Աշխարհի խոշորագույն սոցկայքի՝ Facebook-ի հիմնադիր-ղեկավար Մարկ Ցուկերբերգը դուրս է մնացել Bloomberg հանդեսի վարկածով աշխարհի ամենահարուստ մարդկանց վարկանշային աղյուսակի առաջատար եռյակից:

Հայտնի է, որ Ցուկերբերգը 3-րդ հորիզոնականից 6-րդում է հայտնվել, քանի որ նախօրեին Facebook-ի արժեթղթերի գնի կտրուկ անկման պատճառով մոտ 17 մլրդ դոլար է կորցրել:

Ավելի վաղ Bloomberg-ը Ցուկերբերգի կարողությունը գնահատել էր 86.5 մլրդ դոլար, մինչդեռ հիմա նա ունի 70.6 մլրդ դոլար:

Ամենահարուստ մարդկանց ցանկում Ցուկերբերգից առաջ են անցել ամերիկացի ներդրող Ուորեն Բաֆետը, Louis Vuitton Moët Hennessy ընկերությունների խմբի ֆրանսիացի նախագահ Բեռնար Առնոն, իսպանական Inditex ընկերության հիմնադիր Ամանսիո Օրտեգան:

Հիշեցնենք, որ Facebook-ի արժեթղթերի գինն ընկել է ընկերության եռամսյակային ֆինանսական հաշվետվության հրապարակումից, ինչպես նաև ոլորտի փորձագետների կողմից ընթացիկ տարվա կտրվածքով Facebook-ի համար բացասական կանխատեսում տալուց հետո:

Դրա հետևանքով ընկերության արժեթղթերի գինն ընկել է 24%-ով, ինչը Facebook-ի պատմության մեջ արժեթղթերի գնի անկման խոշորագույն դեպքն է:

Ֆինանսական հաշվետվությունում նշվում է, որ ընկերությունն անցած եռամսյակում ունեցել է 13 մլրդ դոլարի շրջանառություն, ինչը եղել է շատ ավելի քիչ փորձագետների կանխատեսածից: