ՆԱՏՕ-ն շարունակում է աջակցել Հարավային Կովկասում հակամարտությունների խաղաղ կարգավորմանն ուղղված ջանքերին

Մենք պահպանում ենք մեր կոմնակցությունն աջակցությանը Հայաստանի, Ադրբեջանի, Վրաստանի եւ Մոլդովայի տարածքային ամբողջականությանը, անկախությանն ու ինքնիշխանությանը: Այս մասին ասվում է Բրյուսելում կայացած գագաթնաժողովի արդյունքներով ՆԱՏՕ-ի անդամ երկրների ղեկավարների Հռչակագրում:

Հռչակագրում նշվում է, որ ՆԱՏՕ-ի անդամները շարունակում են սատարել բոլոր գործընկերներին իրենց արտաքին քաղաքականության եւ անվտանգության քաղաքականության ընտրության հարցում անկախ եւ ինքնիշխան որոշումներ կայացնելու իրավունքը՝ առանց արտաքին ճնշման եւ հարկադրանքի:

«Այս համատեքստում մենք շարունակում ենք աջակցել Հարավային Կովկասում հակամարտությունների խաղաղ կարգավորմանն ուղղված ջանքերին, ինչպես նաեւ Մոլդովայի Հանրապետությունում` միջազգային իրավունքի այս սկզբունքների եւ նորմերի, Միավորված ազգերի կազմակերպության կանոնադրության եւ Հելսինկյան եզրափակիչ ակտի հիման վրա: Մենք կոչ ենք անում բոլոր կողմերին, ուժեղացված քաղաքական կամք դրսեւորելով, կառուցողականորեն աշխատել՝ հակամարտությունների խաղաղ կարգավորման ուղղությամբ՝ բանակցությունների համար սահմանված շրջանակներում»,- նշվում է հայտարարության մեջ: