C-400-ի ձեռքբերումը Թուրքիայի համար ազգային խնդիր է․ թուրք նախարար

Թուրքիայի ներքին գործերի նախարար Սուլեյման Սոյլուն հայտարարել է, որ ռուսական C-400 զենիթահրթիռային համակարգերի գնումը Թուրքիայի համար «ազգային խնդիր է», գրում է թուրքական «Յենի Շաֆաք» պարբերականը։

«Ինչո՞ւ է Թուրքիան ցանկանում ունենալ այդ համակարգերը։ Թուրքիան դա ցանկանում է մեկ աստիճանով վեր բարձրանալու համար, իրեն ուղղված վտանգը չեզոքացնելու համար։ Դա մեր ազգային պահանջն է։ Ի՞նչ են ուզում դրան դեմ դուրս եկողները։ Ցանկանում են, որ Թուրքիան խոցելի դառնա արտաքին վանգի առաջ։ Սա այս պահին մեր երկրի համար ամենակարևոր խնդիրներից մեկն է։ Եթե մենք սա ապահովենք՝ ապահովված կլինենք մեր անկախությունն ու ազատությունը», - ասել է Սոյլուն։

Թուրքիայի ՆԳ նախարարը նաև պնդել է, որ ներկայում Թուրքիայի դեմ «խաղեր խաղացողները» շատ են, և բազմաթիվ երկրներ ցանկանում են դիտավորյալ նվազեցնել Թուրքիայի դերն ու ներուժն աշխարհում։

«Սակայն Արևմուտքի ու Արևելքի միջև ամենավստահելի կամուրջը, միանշանակ, Թուրքիան է», - ասել է թուրք նախարարը։

Ավելի վաղ ԱՄՆ ռազմական գերատեսչության ղեկավար Ջեյմս Մեթիսը, խոսելով Թուրքիայի կողմից ռուսական C-400 համակարգերի գնման մասին, նշել է, որ Վաշինգտոնը պատրաստ է այլընտրանքային տարբերակ առաջարկել Թուրքիային:

2017 թվականին Ռուսաստանի և Թուրքիայի միջև C-400 համակարգերի գնման շուրջ կնքված գործարքը Թուրքիային արժեցել է ավելի քան 2 մլրդ դոլար: