Պուտինը գերմաներեն խնդրել է ավստրիական ORF-ի լրագրողին չընդհատել իրեն

ՌԴ նախագահ Վլադիմիր Պուտինն ավստրիական ORF հեռուստաալիքին հարցազրույց տալու ժամանակ խնդրել է իրեն ընդհատող լրագրողին համբերատար լինել ու լսել իրեն մինչև վերջ: Հատկանշական է, որ մի պահ Պուտինն այս արտահայտությունն արել է գերմաներեն: Այս մասին հայտնում է kremlin.ru-ն:

«Բարի եղեք, թույլ տվեք ասել», - ասել է Պուտինը:

«Եթե դուք համբերատար լինեք ու լսեք ինձ մինչև վերջ, ապա կիմանաք իմ տեսանկյունն այս հարցի շուրջ: Լա՞վ», - ասել է Պուտինը 45 րոպե տևած հարցազրույցի ժամանակ:

Նշվում է, որ այսպես Պուտինը պատասխանել է լրագրողի՝ Դոնբասում Boeing ինքնաթիռի կործանման մասին հարցին: Մինչև վերջ չլսելով նախագահի պատասխանը՝ լրագրողը փորձել է պարզել նրա դիրքորոշումն այս հարցում:

Հարցազրույցի ընթացքում Պուտինը ևս մեկ անգամ խնդրել է չընդհատել իրեն 2014 թվականին Ղրիմում ռուսական ուժերի ներկայության մասին հարցից հետո:

«Մի վայրկյան, թողեք՝ ասեմ: Դուք ուզում եք անընդհատ հարցե՞ր տալ, թե՞ ուզում եք լսել իմ պատասխանները», - ասել է Պուտինը:

«Seien Sie so nett, lassen Sie mich etwas sagen (Բարի եղեք, թույլ տվեք ասել)»,- հավելել է նա։